Հունահռոմեական ըմբիշ Ռուլոն Գարդները պատմության մեջ միակ մարդն է, որը 2000 թվականի Սիդնեյի օլիմպիական խաղերի եզրափակիչում հաղթել է լեգենդար Ալեքսանդր Կարելինին` ռուս գերծանր քաշայինին մեկ քայլ առաջ կանգնեցնելով 4-րդ օլիմպիական ոսկին նվաճելուց:
Սակայն Գարդների կենսագրություն այնքան հարուստ է ամենաանհավանական փորձություններով, որ նրան առանց դրա էլ կարելի է անվանել «Ամենահաջողակ Ձախորդ Փանոս»:
Դպոցահասակ ժամանակ Ռուլոնը հենց դասարանում ինքնաշեն աղեղնազենով ծակել է փորը, 1990-ին տարել դստեր մահը: Իսկ 2002 թվականին, երբ օլիմպիական չեմպիոնի կոչմանն ավելացրել էր նաեւ աշխարհի ոսկին, ձնագնացով կորել է սարերում`ժամեր շարունակ սառչելով: Փրկվելուց հետո բժիշկները ստիպված կտրել են նրա ոտքի ցրտահարված մատը:
Սակայն սա դեռ ավելի ծանր ու անհավանական փորձությունների սկիզբն էր միայն: 2004 թվականին մոտոցիկլետ վարելիս Գարդները վրաերթի է ենթարկվել, իսկ 2007- ին ինքնաթիռը, որի մեջ գտնվում էր ինքը, ընկել է լիճը: Ռուլոնից մեկ ժամից ավելի է պահանջվել ընդամենը +7 աստիճան ջրից լողալով ափ դուրս գալու համար, որից հետո ամբողջ գիշերն անցկացրել է ափին:
Կարդացեք նաև
Ամերիկացի «Ձախորդ Փանոսի» վերջին փորձությունը անձնական քաշն է եղել, որը 2010 թվականին հասել է 215 կիլոգրամի: Ավելորդ կիլոգրամներից ազատվելու նպատակով նա մասնակցել է «The Biggest Losser» ռեալիթի շոուին եւ վեց ամսում գցել 70 կիլոգրամ:
Հիմա 41-ամյա Գարդները որոշել է անել ամեն ինչ` Լոնդոնի օլիմպիական խաղերին մասնակլցելու համար: Մեկ ամիս առաջ նա մասնակցել է հունահռոմեական ըմբշամարտի ԱՄՆ-Հնդկաստան մրցամարտին եւ մտադրվել է հանդես գալ Ամերիկայում կայանալիք Լոնդոն 2012-ի օլիմպիական որակավորման մրցաշարում:
Աշոտ ՀԱԿՈԲՅԱՆ
