«Ազգային գրադարանային շաբաթվա» շրջանակներում Երաժշտագիտակյան գրադարանի կողմից կազմակերպված հերթական միջոցառումներից մեկը, որ կայացավ օրերս, նվիրված էր պրոֆեսոր, երգիչ, կոմպոզիտոր, ՀՀ պետական մրցանակի դափնեկիր, ՀՀ արվեստի վաստակավոր գործիչ Արզաս Ոսկանյանի ծննդյան 65 եւ ստեղծագործական գործունեության 60-ամյակին: Ցերեկույթն ուղեկցվեց ցուցահանդեսով, որտեղ ներկայացվեցին կոմպոզիտորի կյանքին ու գործունեությանը նվիրված նյութեր: Շնորհավորական խոսքով հանդես եկավ Երաժշտագիտակյան գրադարանի տնօրեն Գուլո Նահատակյանը:
Միջոցառումը վարում էր հոբելյարը, որը հակիրճ ներկայացրեց կյանքի, ստեղծագործական գործունեության անցած ուղին: Համերգային կատարումներով հանդես եկան պրոֆեսորի սաները: «Պատարագ» երգչախմբի կատարմամբ հնչեցին հատվածներ կոմպոզիտորի «Պատարագից»: Ցերեկույթն ավարտվեց պրոֆեսորի ելույթով, տիկնոջ՝ Քնարիկ Տեր-Սիմոնյանի նվագակցությամբ:
