Կանանց սիրողական բռնցքամարտն առաջին անգամ է մտել օլիմպիական խաղերի ծրագիր
Մեզ համար դեռ անսովոր այս մարզաձեւի ներկայացուցիչներն ամառային 30-րդ օլիմպիական խաղերի ռինգում չեմպիոնական տիտղոսի համար պայքարելու են երեք քաշային կարգերում՝ 51, 60 եւ 75: Իսկ դեպի Լոնդոն տանող միակ ճանապարհը կին բռնցքամարտիկների համար անցնում է Չինաստանով, որտեղ մայիսի 10-ից 20-ը կայանալու է աշխարհի կանանց առաջնությունը:
Հայաստանից այդ մրցաշարին մասնակցելու է երկու հոգի՝ 60 կգ քաշային Արմինե Սինաբյանը (լուսանկարում՝ ձախից, նա բնակվում եւ մարզվում է Շվեդիայում) եւ 75 կգ քաշային Աշխեն Սիմոնյանը: Ներկայումս երկուսն էլ ուսումնամարզական հավաք են անցկացնում Աբովյանում:
Կարդացեք նաև
«Առավոտը» երեկ զրուցեց Հայաստանի կանանց հավաքականի գլխավոր մարզիչ Ռաֆայել Մեհրաբյանի հետ:
– Պարոն Մեհրաբյան: Դուք զբաղեցնում էիք տղամարդկանց ընտրանու գլխավոր մարզչի պաշտոնը…
– Այո: Իսկ հիմա գլխավորում եմ կանանց բռնցքամարտի հավաքականը:
– Հայաստանում կանանց բռնցքամարտ, որպես այդպիսին՝ գոյություն ունի՞:
– Պատկերացրեք՝ այո: Եվ առաջին քայլերն է անում: Հիմա մեր հավաքականում շուրջ 20 աղջիկ է մարզվում: Ճիշտ է, նրանք դեռ հեռու են միջազգային մրցումներում լուրջ հաջողությունների հասնելու մակարդակից, սակայն կարեւորն այն է, որ գործ արվում է:
– Այսինքն՝ կանոնավոր մարզումներ անցկացվո՞ւմ են:
– Այո:
– Բայց առաջընթաց ունենալու համար նախ ֆինանսական միջոցներ եւ մրցակցություն է հարկավոր:
– Համաձայն եմ: Կանանց բռնցքամարտը մեր հանրապետությունում առայժմ պետական ֆինանսավորում չունի: Այն պահում է ֆեդերացիան: Իսկ քաշային կարգերում մրցակցության խնդիր, իրոք, գոյություն ունի: Այդ բացն առայժմ աշխատում ենք լրացնել մարզումների եւ հավաքների ժամանակ տղաների էլ ներգրավելով: Նրանք շատ են օգնում:
– Այդպես երկա՞ր է շարունակվելու:
– Առայժմ կոնկրետ ոչինչ ասել չեմ կարող: Ուզում ենք անել մեզանից կախված ամեն բան, որպեսզի գոնե եկող տարվանից կանանց բռնցքամարտն էլ պետությունից ֆինանսավորվի:
– Ի՞նչ ասել է՝ հնարավոր ամեն բան:
– Հիմա մեր երկու աղջիկներ՝ 60 կգ քաշային Արմինե Սինաբյանը եւ 75 կգ քաշային Աշխեն Սիմոնյանը պատրաստվում են մեկնել աշխարհի առաջնություն: Եթե նրանք այնտեղ հաջող հանդես գան, արդյունք ցույց տան, կարծում եմ, դա եկող տարվանից պետությունից համապատասխան վերաբերմունքի հիմք կլինի:
– Իսկ աշխարհի առաջնությունում, որտեղ նաեւ օլիմպիական ուղեգրեր են խաղարկվում, մեր աղջիկները վարկանիշ ձեռք բերելու հնարավորություն ունե՞ն:
– Պիտի պայքարեն: Օրինակ՝ Արմինեն Եվրոպայի անցած տարվա առաջնության եզրափակչի մասնակից է: Եվ նրա հետ, հասկանալի է, որոշակի հույսեր կապում ենք: Բայց դա չի նշանակում, թե Աշխենը հենց այնպես է մեկնում մրցավայր:
– Օլիմպիական ուղեգիր նվաճելու համար Չինաստանում ի՞նչ տեղ պետք է զբաղեցնել:
– Գիտե՞ք, հաշվարկը կանանց բռնցքամարտում մի փոքր այլ կերպ է ընթանալու: Չինաստանում յուրաքանչյուր քաշային կարգում տարբեր աշխարհամասերի տարբեր քանակությամբ վարկանիշային տեղեր են հատկացված: Մենք ներկայացնում ենք Եվրոպան, որին հատկացված է երեքական ուղեգիր: Հետեւաբար, մեր աղջիկներն իրենց քաշային կարգերում պիտի առնվազն եվրոպացիների մեջ տեղ զբաղեցնեն երեք լավագույնների մեջ:
ԱՇՈՏ ՀԱԿՈԲՅԱՆ
«Առավոտ» օրաթերթ
