Տղամարդիկ բողոքում են` կանայք շատախոս են, բամբասկոտ, իրենց զրույցի ընթացքում դիտմամբ թե պատահմամբ հրապարակում են ուրիշի գաղտնիքը: Ոչ պակաս բողոքում են նաև կանայք`երբեմն իրենց անձնական գաղտնիքները մտերիմներին վստահելուց հետո չգիտես` ինչու՞ դառնում են հանրության քննարկման առարկա: «Հիմնականում գաղտնիքներս վստահում եմ մտերիմ ընկերներիս, ինքս գաղտնապահ եմ, ոչ մի անգամ ինձ վստահված գաղտնիքը չեմ ասում ուրիշին: Սակայն եղել է դեպք, երբ իմ գաղտնիքը ասել եմ ընկերուհուս, իսկ նա `ուրիշին, հիշում եմ` իրար հետ լավ կռվեցինք »,-պատմում է Լիանան ու հավելում`իր կարծիքով գաղտնապահ լինում են միայն տղաները: Մարիան նույնպես այդ կարծիքին է . «Երբ գաղտնիքներս վստահել եմ աղջիկների, նրանք վերափոխված ձևով ուրիշներին են ասել, բայց երբ տղաների հետ եմ կիսվել, այդ գաղտնիքը նրանց բերանից դուրս չի եկել և մնացել է գաղտնիք »: Այնուամենայնիվ Մարիան համոզված է` գաղտնիքդ պետք է միայն քեզ վստահես: Հետաքրքիր է`հակառակ սեռի ներկայացուցիչ Արսենը հակառակ կարծիքին է. «Աղջիկները ավելի վստահելի են, քան տղաները: Անձամբ ես իմ գաղտնիքները կիսում եմ իմ սիրելի էակի հետ: Գաղտնիքներ պետք է ասես այնպիսի մարդու, որին համարում ես քո երկրորդ կեսը, ինչո՞ւ չէ նաև ինքդ քեզ»: Արսենը նաև խոստովանում է` մի անգամ իրեն վստահված գաղտնիքը միամիտ բարձրաձայնել է:
Բրիտանացի գիտնակններն էլ եզրակացնում են ` կինը ի վիճակի է ուրիշի գաղտնիքը պահել միջինը 47 ժամ 15 րոպե: Այդ կարծիքին նրանք հանգել են իրենց անցկացրած հետազոտության արդյունքում, որին մասնակցել են 18-ից 65 տարեկան 3000 կանայք: Հետաքրքիր է` գաղտնիքն հրապարակած կանանց գերակշռող մասը շարունակել է պնդել, որ իրենք միանգամայն գաղտնապահ են: Հետաքրքիր է նաև այն, որ հաճախ ուրիշի գաղտնիքը կանայք պատահաբար հրապարակում են հեռախոսազրույցների ժամանակ: Այս մասին հայտնում է The Daily Telegraph-ը:
Տղամարդկանց մեծամասնության կարծիքով` կանայք ուրիշի գաղտնիքները բարձրաձայնում են իրենց շատախոսության պատճառով: Ըստ գիտնականների հաշվարկի `տղամարդիկ օրական միջինը արտաբերում են` 12 500, մինչդեռ կանայք` 25 000 բառ`գրեթե 2 անգամ ավելի շատ:
Մարտին Բաղդասարյան
