Այսօր նախընտրական քարոզարշավի շրջանակներում Գեղարքունիքի մարզկենտրոնում էր ՀՀԿ առաջնորդ, ՀՀ նախագահ Սերժ Սարգսյանը: Նրան դիմավորելու եւ ՀՀԿ նախընտրական ծրագրին ծանոթանալու համար Գավառի կենտրոնական հրապարակում հավաքվել էին մեծաթիվ բնակիչներ` ոչ միայն Գավառից, այլեւ հարակից գյուղերից:
Իր ելույթում ՀՀԿ առաջնորդ Սերժ Սարգսյանը շեշտը դրեց երկու կարեւոր խնդիրների վրա: «Մեր հիմնախնդիրներից առաջինը Սեւանա լճի խնդիրների լուծումն է: Սեւանը մեր հացն է ու մեր հոգսը: Մեր պարգեւը: Աստված շռայլ է գտնվել մեր նկատմամբ: Մենք հանձն ենք առել ոչ միայն Սեւանը փրկելու, այլեւ դրա պաշարները վերականգնելու գործը»: Նախագահը հավելեց նաեւ, որ Սեւանա լճի պահպանման հիմնական քայլերից մեկն արված է: «Այս տարի կավարտվեն Գավառ, Մարտունի եւ Վարդենիս քաղաքներում կոյուղաջրերի մաքրման կայանների կառուցումն ու կոյուղացանցերի նորացումը»,- նշեց Ս. Սարգսյանը:
«Մենք որպես կառավարող քաղաքական ուժ` մեր առաքելությունը տեսնում ենք աշխատող մարդու հոգսերը թեթեւացնելու մեջ: Արդյունաբերական արտադրանքի ծավալը Գեղարքունիքում 2011 թվականին նախորդ տարվա համեմատ աճել է 40 տոկոսով, նախորդ տարում հանրապետության գյուղատնտեսության համախառն արդյունքի մեկ հինգերորդը ապահովել է Գեղարքունիքի մարզը: Սա ավելին է, քան հանրապետության որեւէ այլ մարզ: Մենք վստահորեն ասում ենք, որ դուք աշխատող մարդիկ եք, մենք նաեւ լավ գիտենք, որ որքան մարդ կա, որ աշխատանք չունի»,- ասաց ՀՀ նախագահը:
«Հրապարակվող թվերը, իհարկե, հուսադրող են, բայց մենք թե Գավառի, թե Գեղարքունիքի, թե ողջ Հայաստանի կենսամակարդակը համարում ենք ոչ բավարար: Մեր ժողովուրդը արժանի է ավելի լավ պայմանների»,- իր խոսքում ասաց ՀՀ նախագահը:
Կարդացեք նաև
Այնուհետեւ ՀՀ նախագահը Հայաստանը համեմատեց Սեւանա լճի հետ, որի ջուրն առաջ բարձրացվում էր սանտիմետր առ սանտիմետր, իսկ հիմա` մետր առ մետր: «Բարեփոխումների նոր ալիքը մեր երկրի երեսից սրբելու է շատ բան, որ հնացած է եւ ապրել է իր դարը: Մյուս կողմից բերելու է նոր մոտեցումներ, նոր աշխատաոճ, նոր կենսամակարդակ, նոր աշխատատեղեր, նոր գիտակրթական ու առողջապահական նշաձող: Նոր Հայաստան, որին մենք արժանի ենք, որը կախված է ոչ միայն իշխանություններից, այլեւ յուրաքանչյուրիդ կամքից, ընտրությունից»,- ասաց ՀՀ նախագահը:
Եւ ամենավերջում նախագահ Սերժ Սարգսյանը կոչ արեց բոլորին մասնակցել ընտրություններին եւ իրենց ակտիվ ընտրությամբ օգնել երկրի կայացմանը. «Մայիսի 6-ին մասնակցեք ընտրություններին: Ձեզնից յուրաքանչյուրի քվեն մեր համար կարեւոր է, ձեր քվեով է ձեւավորվելու ՀՀ ազգային ժողովը, կառավարությունը»:
Անի ՊՈՂՈՍՅԱՆ
