Եվրոպայի խորհրդի կայքէջում այսօր հրապարակվել է ԵԽԽՎ-ում Հայաստանի պատվիրակության անդամ Հերմինե Նաղդալյանի ելույթը, որը նա պետք է ունենար Վեհաժողովի ապրիլի 23-ի նիստում, սակայն չկարողացավ՝ ժամանակը սպառվելու պատճառով: Հիշեցնենք, որ նման ելույթներն ընդգրկվում են նիստի պաշտոնական արձանագրության մեջ՝ որպես հավելված:
Հերմինե Նաղդալյանի ելույթի թեման Ցեղասպանությունն է. նա շնորհակալություն է հայտնել բոլոր պետություններին, որոնք ճանաչել են այն եւ պայքարում են ընդդեմ մարդկության դեմ գործած հանցագործությունների. «Տրամաբանական է, որ Թուրքիայի Հանրապետությունը, որպես Օսմանյան կայսրության իրավահաջորդ, պետք է առաջինը ճանաչեր ու դատապարտեր ցեղասպանությունը»:
Հերմինե Նաղդալյանը նաեւ հիշեցրել է, որ Թուրքիայի զինվորական դատարանը 1918 թվականին մահվան դատապարտեց բարձրաստիճան պաշտոնյաների, որոնք կազմակերպել էին ջարդերը. «Այնուհետեւ Թուրքիան այնքան մոռացավ սեփական պատմությունը, որ կոչ արեց ստեղծել պատմաբանների հանձանաժողով՝ ուսումնասիրելու այդ դեպքերը»:
Հայ պատվիրակը ելույթում մեջբերումներ է արել Հայոց Ցեղասպանության վերաբերյալ Ուինսթոն Չերչիլի, Ադոլֆ Հիտլերի խոսքերից, մեջբերել փաստաթղթեր, եւ եզրակացրել. «Ցեղասպանության հարցը՝ միջազգային օրենքների համաձայն, դատարանի քննարկելիք խնդիր է եւ, եւ ոչ պատմաբանների հարց»:
Կարդացեք նաև
Հերմինե Նաղդալյանը ելույթը եզրափակել է այսպես. «Որպես իգդիրցի հայերի ժառանգ՝ այսօր, երբ իմ երկիրը հիշում է ցեղասպանության օրը՝ ես խոնարհում եմ գլուխս միլիոնավոր զոհերի առջեւ ու հավատում, որ թուրք գործընկերներս կմիանան ինձ մոտ ապագայում, քանի որ երբեք ուշ չէ նայել սեփական պատմության աչքերին»:
