Այսօր Հայաստանի գործատուների միության հյուրը «Ժառանգության» ներկայացուցիչն էր՝ Հովսեփ Խուրշուդյանը: Նա ներկայացրեց «Ժառանգության» մոտեցումները՝ Հայաստանի մրցակցային միջավայրի բարելավման թեմայով: Ըստ Հ. Խուրշուդյանի, ՓՄՁ-ների վրայից հարկային բեռը պետք է թեթեւացնեն եւ այն ուղղեն դեպի խոշոր բիզնես. «Գույքահարկի մեխանմիզմ ենք առաջարկում 600 մլն-ից սկսած: Այն կուտակած հարստության համար է գործելու: Շահութահարկից առաջարկում ենք ազատել փոքր ու միջին բիզնեսը: Չենք առաջարկում վերադառնալ պարզեցված հարկին, առաջարկում ենք ուղղակի ազատել շահութահարկից ՓՄՁ-ն, իսկ ավելի խոշորների համար առաջարկել հատուկ պրոգրեսիվ հարկ»:
Պարոն Խուրշուդյանը ներկայացնելով ներկա անհավասար, ոչ մրցակցային պայմանները՝ ասաց. «Դրա համար էլ «Լինսի» հիմնադրամի ծրագիրը սառեցվեց, Քըրք Քըրքորյանը վերջին ներդրումը որ կատարեց $200 մլն էր, եթե դա ներդրվեր մեր գիտության վրա, ուղղակի թռիչքաձեւ զարգացում կապրեր: Քըրքորյանը Հայաստանից հիասթափվեց հենց այդ կոռուպցիայի երեւույթների համար»:
Անդրադառնալով հարկային-մաքսային վարչարարությանը՝ Հովսեփ Խուրշուդյանը նշեց, որ մարդիկ բողոքում են ոչ թե բարձր ինվոյսներից, այլ՝ անհավասարությունից, որ մեկը գործում է թափանցիկ, նորմալ հարկերը վճարում է, մյուսը ապրանքը կաշառքով անցկացնում սահմանը: Հարցին՝ ՊԵԿ նախագահին հանելո՞ւ եք աշխատանքից՝ Հ. Խուրշուդյանը պատասխանեց. «Անպայման, հենց իշխանության գանք, առաջինը դա ենք անելու»:
Հռիփսիմե ՋԵԲԵՋՅԱՆ
