ԱՄՆ-ի մայրաքաղաք Վաշինգտոնում՝ Կապիտոլիումի մոտակայքում գտնվող Բարեփոխման լյութերանական եկեղեցում երկուշաբթի օրը կայացել է Ամերիկայի Հայոց ցեղասպանության թանգարանի հովանու ներքո կազմակերպված «Հայոց ցեղասպանության ականատեսներ» խորագրով ցուցահանդեսը, որտեղ ներկայացված են Հայոց ցեղասպանության վերաբերյալ գերմանացի ականատեսների կողմից արված լուսանկարները:
Այս մասին երկուշաբթի օրը տարածված հաղորդագրությունում հայտնել է «Ամերիկայի Հայոց ցեղասպանության թանգարան»-ը՝ նշելով, որ պաշտոնական բացումը կայացել է ԱՄՆ-ում Հայաստանի դեսպան Թաթուլ Մարգարյանի, Հայաստանի մշակույթի փոխնախարար Արթուր Պողոսյանի, Բարեփոխման լյութերանական եկեղեցու քահանա, պատվելի Մայքլ Վիլքների և Վաշինգտոնում Հայ Առաքելական եկեղեցին ներկայացնող Տ. Վիգեն Արքեպիսկոպոս Հայկազյանի մասնակցությամբ:
Ցուցահանդեսն այցելել են նաև Էնն Արբորի Միչիգանի համալսարանի Մարի Մանուկյանի անվան հայոց լեզվի և գրականության ամբիոնի վարիչ Գևորգ Բարդաքջյանը և Հայաստանում ԱՄՆ-ի նախկին դեսպան Ջոն Էվանսը:
Հաղորդագրությունում նշվել է, որ ցուցահանդեսի բացման ընթացքում շնորհակալական խոսք է ուղղվել տիկին Ռիտա Բալյանին, որը իր հանգուցյալ ամուսին Վարդգես Բալյանի հետ միասին մեկնարկել են ցուցահանդեսի նյութերի նախապատրաստությունը և մեծ օժանդակություն ցուցաբերել ցուցահանդեսը կյանքի կոչելու գործում:
Կարդացեք նաև
Ըստ է Ամերիկայի Հայոց ցեղասպանության թանգարանի հաղորդագրության, ցուցահանդեսի անցկացումը հնարավոր է դարձել եվրոպական արխիվներում կատարված մի քանի տարվա ուսումնասիրությունների արդյունքում: Ցուցահանդեսում ներկայացված բազմաթիվ լուսանկարներ ցուցադրվել են առաջին անգամ՝ տասնամյակներ շարունակ մոռացության մատնվելուց հետո:
Լուսանկարների վրա պատկերված են հայ գաղթականներն աքսորի ճանապարհին: Լուսանկարներին կից ներկայացված են հեղինակների օրագրային գրառումները և հուշագրությունները, որոնք վկայում են լուսանկարների վավերականության մասին:
Արմեն Հովհաննիսյան
«Ամերիկայի Ձայն»
