Հատված «Ժառանգության» խմբակցության պատգամավոր Անահիտ Բախշյանի հարցազրույցից
– Անցնող շաբաթ մամուլը ողողված էր նաև Րաֆֆի Հովհաննիսյան–իշխանություն գործարքի մասին տեղեկություններով։ Ճշմարտության հատիկ կա՞ սրանում։
– Հերթական «մուտիլովկաներն» են անում այն քաղաքական ուժերը, որոնք ձայնագողությամբ են զբաղված եւ իրենց դիրքը վտանգված են տեսնում։ Իրենք գիտեն, որ ժողովուրդն իրենց ձայն չի տալու։ Ավելին, «Ժառանգության» աշխատանքն են գնահատում, ուստի փորձում են շեղել մարդկանց ուշադրությունը։ Մի խոսքով, ժողովրդական լեզվով ասած, այդպիսի բան ասողները գլուխները պատով են տվել։ Էդ մարդը քսան տարի իր ուրույն հետագծով, կենսագրությամբ ապրում է Հայաստանում։ Պախարակելու, հեղինակազրկելու այլ ձեւ չեն գտնում ու նման լուրեր են տարածում, որը հենց իրենց դեմ է աշխատելու։ Այդ սեւ PR-ն ավելի շատ իրենց դեմքն է բացահայտելու։
– Հետաքրքիր է, որ նման տեսակետ հայտնում են հիմնականում ընդդիմադիր թեւի ներկայացուցիչները։
Կարդացեք նաև
– Էդ ընդդիմություն կոչվածը եղել է իշխանություն ու շատ լավգիտի ինչ հնարքներով պիտի կեղծել ընտրությունները։ Այսօր էլ իր ձեռագիրը չի փոխել, նույն քայլերով, վարքագծով շարունակում է քարոզարշավը։ Սա պատահական չէ, որովհետեւ մենք եւ իրենք արմատապես տարբեր ընդդիմություն ենք։ «Ժառանգություն» քաղաքական ուժի ոչ մի ներկայացուցչի կենսագրության մեջ չեն կարող մատնացույց անել մի կեղտոտ էջ, մինչդեռ իրենք թաթախված են այն ամենի մեջ, ինչը քննադատում են, «հյութեղ» բառերով ծաղկում։
Ռուզան ԽԱՉԱՏՐՅԱՆ
«Իրատես դե ֆակտո»
