Այսօր «Օրինաց երկիր» կուսակցության ղեկավարը Քանաքեռ Զեյթուն համայքի բնակիչների հյուրն էր: Քարոզարշավի շրջանակներում կուսակցության ղեկավար Արթուր Բաղդասարյանը հիշեցրեց մի քանի տարի առաջ վճարովի ու «մաղարիչներով» ընդունված ծննդօգնությունը ու ասաց՝ հիմա, որ կանայք ծննդաբերում են սերտիֆիկատներով, դա իրենց կուսակցության հեղինակած օրենքի շնորհիվ է: «Ես խնդրում եմ բոլորդ հիշեք, ընդամենը 3 տարի առաջ նույն Քանաքեռ-Զեյթուն համայնքում քանի մանկապարտեզ ծախեցին՝ 1400 մանկապարտեզից 650-ը վաճառեցին, եւ նորից շնորհիվ մեր հեղինակած օրենքի ու պայքարի, Հայաստանում չեն կարող վաճառվել ոչ մանկապարտեզ, ոչ դպրոց, ոչ էլ մշակութային շենքեր»,-ասաց պարոն Բաղդասարյանն ու մարդկանց կոչ արեց վանկարկել «Օրինաց, հաղթական»:
Պարոն Բաղդասարյանը նաեւ ներկայացրեց այդ համայնքում մեծամասնական ընտրակարգով առաջադրված ՕԵԿ թեկնածուին ու հորդորեց քվեարկել հենց նրա օգտին. «Մհեր Շահգելդյանը կիրթ, ինտելիգենտ, մտավորական մարդ է, նրա ներկայությունը Ազգային ժողովում նշանակում է քանաքեռցու, զեյթունցու հոգսերով ամենօրյա հետաքրքրություն, նրա ներկայությունը նշանակում է, որ մեր քաղաքական թիմը նրա ներգրավվածությամբ անելու է հնարավորը այս համայնքի ու մեր երկրի կուտակված խնդիրները լուծելու համար»:
Մինչ պարոն Բաղդասարյանի ելույթը կավարտվեր մի քաղաքացի մատը թափ տալով եկավ, նայեց ՕԵԿ ղեկավարներին ու վազելով հեռացավ:
Արփինե ՍԻՄՈՆՅԱՆ
Կարդացեք նաև
