«Աղջիկս ջերմում էր, ու ինձ բժշկական տեղեկանք էր անհրաժեշտ`դպրոցում բացակաները հարգելի դարձնելու նպատակով:
Տեղեկանքը ստանալու համար` ինձ ասացին,որ ամենաքիչը երեք հազար դրամ գումար պետք է վճարեմ: Բժիշկը կարծես առևտրային կապեր էր ուզում հաստատել»,-ասում է տիկին Անահիտը:
Դեռևս 2011 թվականի հունիս ամսին վարչապետ Տիգրան Սարգսյանը նշել էր. «Պետք է ձեռնպահ մնալ դիմորդներից և աշխատողներից կամ աշխատանքի ընդունվելու համար դիմած քաղաքացիներից օրենսդրությամբ չնախատեսված և չպահանջվող տեղեկանքներ պահանջելուց և տրամադրելուց: Դրանց մատուցման կարիքն ուղղակի չկա, որովհետև դրանք ավարտվում են դրամաշորթությամբ: Եվ այդ արհեստական պահանջները մենք վերացնում ենք`չհակասելով օրենքին: Այս փաստաթուղթն ունի քաղաքական բովանդակություն.մենք մեր քաղաքացիների կյանքը հեշտացնում ենք,նրանցից այլևս չեն պահանջելու տեղեկանքներ»:
Այս տարի « Ես գիտեմ » հասարակական ծառայությունը ,սոցիալական ցանցերում, «որպես օրենք», հայտարարեց. «ոչ մի բժշկական տեղեկանք՝ մանկապարտեզ, դպրոց և բուհ ներկայացնելու համար » : Սոցիալական ցանցերում սա մեծ արձագանք գտավ և տասնյակ հարցեր առաջացան: Ուսանողուհի Կարինե Գրիգորյանը համամիտ չէ ընդունված որոշման հետ. « Ստացվում է, որ թողնում են մարդկանց խղճի վրա: Տվյալ պարագայում, եթե ուսանողը քաղաքից դուրս է գնում կարող է զանգել և ասել,որ հիվանդ է: Սա մի քիչ անլուրջ է թվում. ուսանողը հեշտությամբ կարող է խաբել: Բժշկական տեղեկանքը վերածվել է խղճի տեղեկանքի:
Բժշկուհի Ամալյա Հակոբյանին վերջերս շատ են դիմել բժշկական տեղեկանքներ տրամադրելու հարցով. «Եղել են դեպքեր,երբ եկել են բժշկական տեղեկանքի փոխարեն խնդրել են, որ ստորագրեմ: Դպրոցներում ուսուցիչներ կան չեն հավատում, որ աշակերտն իրոք բացակայության ընթացքում հիվադ է եղել: Մեզ մոտ էլ տեղեկանքներ չեն տրվում: Մարդիկ երբեմն գումար են առաջարկում տեղեկանքի դիմաց: Սա նույնիսկ ծիծաղելի է`մեզ մոտ կաշառքներ չեն ընդունվում»,- ասում է նա:
Ուսուցչուհի Նելլի Սարգսյանի համար բժշկական տեղեկանքներն ավելի մեծ խաբկանք են. «Այսպես թե այնպես այդ բժշկական տեղեկանքները կեղծ են, հետևաբար իմաստ էլ չուներ դրանց կիրառությունը : Տեղեկանքները մի հատ էլ դեռ ավելացնում են կաշառակերությունը :
Եթե հիվանդությունը երկար ընթացք է ունենում,ապա ուսանողը,կամ աշակերտը կարող է տվյալ կրթական հաստատությանը ներկայացնել իր հիվանդության պատմությունը `էպիկրիզը : Սակայն սա էլ ներկայացվում է ըստ ցանկության,կրթական հաստատությունը իրավունք չունի պահանջելու»,- ասում է նա:
Անուշ Առաքելյան
Հ.Գ Չնայած ընդունված որոշմանն ու օրենքին,այնուամենայնիվ որոշ կրթական հաստատություններում շարունակում են պահանջել բժշկական տեղեկանքներ:
