Այսօր «Նովոստի» միջազգային մամուլի կենտրոնում տեղի ունեցավ Երևան-Մոսկվա տեսակամուրջ` «Ժամանակը չի ջնջում հիշողությունը…» թեմայով: Լրագրողների հետ հանդիպմանը մասնակցում էին Հայաստանի ԳԱԱ Արևելագիտության ինստիտուտի տնօրեն Ռուբեն Սաֆրաստյանը, իսկ Մոսկվայից՝ Սևծովյան-Կասպյան տարածաշրջանի քաղաքական և սոցիալական ուսումնասիրությունների ինստիտուտի տնօրեն Վլադիմիր Զախարովը եւ ՌԳԱ Արևելագիտության ինստիտուտի Կենտրոնական Ասիայի և Կովկասի ինստիտուտի ուսումնասիրության կենտրոնի գիտաշխատող Անդրեյ Արեշևը:
Ռուբեն Սաֆրաստյանն ասաց, որ այս ապրիլի 24-ն էլ սովորականի պես է անցնելու. «Մեկ յուրահատկություն եմ նկատում. Հայաստանում ավելի լուրջ են սկսել վերաբերվել ցեղասպանության ճանաչման խնդրին, քանի որ 3 տարի հետո լրանում է 100-ամյակը»: Պարոն Սաֆրաստյանը հավելեց, որ առաջիկայում ականատես կլինենք տարբեր երկրներում ցեղասպանության դատապարտման ակտիվացմանը. «Դա ոչ միայն Հայաստանի եւ Թուրքիայի, այլ համաշխարհային քաղաքականության խնդիրն է»:
Հարցի շուրջ Վլադիմիր Զախարովը նշեց, որ Ռուսաստանը պետք է աջակցի ճանաչման գործընթացին:
Անդրեյ Արեշեւի համոզմամբ, հատկապես ակտիվ է գործում հայկական դիվանագիտական կողմը. «Խելացի ելույթներ ենք լսում՝ սկսած ՀՀ նախագահից: Ճանաչման եւ փոխհատուցում ստանալու հարցում կարեւոր է նաեւ ՀԿ-ների եւ հայ համայնքների միջեւ կապը»:
Կարդացեք նաև
Ցեղասպանության ճանաչումից Թուրքիայի հրաժարվելը Վ. Զախարովը համարում է ամոթ ու խայտառակություն: Հետազոտողն արդարացնում է Թուրքիայից փոխհատուցում պահանջելու Հայաստանի փորձերը, քանի որ ցեղասպանության մասին պետք է ավելի շատ բարձրաձայնել: «Վերջերս անանուն ադրբեջանցի հեղինակներ Ռուսաստանում հրատարակել են ցեղասպանությունը ժխտող եռհատորյակ: Ինձ զարմացնում է Ռուսաստանի հայ համայնքի պասիվությունը: Ինչո՞ւ Ռուսաստանի հայ հարուստները չեն հավաքվում եւ այդ թյուրիմացությանը պատասխանում»,-ասաց Զախարովը եւ հավելեց, որ հայկական Սփյուռքը չպետք է լռի, այլապես Ռուսական կառավարությունը քայլեր չի ձեռնարկի:
Լուիզա ՍՈՒՔԻԱՍՅԱՆ
