Որեւէ հանդիպում չեմ ունեցել Սերժ Սարգսյանի հետ` հերքեց ՀԱԿ-ի քարոզչամիջոցների կողմից տարածվող լուրերը «Ժառանգության» առաջնորդ Րաֆֆի Հովհաննիսյանը. «Սուտ լուրեր տարածողները թող հիշեն պրոֆեսիոնալիզմի կամ էթիկայի մասին: Իսկ ես կրկնում եմ այն, ինչը մեր քարոզարշավի մեկնարկին ասացի` ի սկզբանե ներում եմ բոլորին, ովքեր անհիմն սխալ, կեղծավոր արտահայտություններ են անում: Եվ եթե ես կամ «Ժառանգության» անդամներից որեւէ մեկը էթիկայի սահմաններից դուրս ենք գալիս, հայցում եմ մեր մրցակիցների ներողամտությունը»:
Թե ինչպես է «Ժառանգությունը» պատրաստվում իրականություն դարձնել իր նախընտրական ծրագրում հռչակված՝ բյուջեի կրկնապատկման խոստումը կամ տարեկան հարյուր հազար մարդու ներգաղթը, Րաֆֆի Հովհաննիսյանը կարճ պատասխանեց. «Ես ոչ միայն անձնական ճարպահանության կողմնակիցն եմ, այլեւ պետական ծախսերի ճարպահանության: Երբ որ ընտրություններից հետո «Ժառանգությունը» կազմի նոր մեծամասնություն եւ ունենա կառավարական լծակներ, մեր ներկայացուցիչները` նախարարներ եւ այլն, իրենց հանրային լծակները չեն օգտագործելու առանձին բիզնես անելու համար, օրենքը առաջինը մեզ վրա ենք կիրառելու, սա վստահության խնդիր եւ օրինականության հարց է: Եթե ստվերային միջոցները, լեւի եկամուտները մտնեն բյուջե եւ բյուջեից ճարպը հանվի` թիկնապահներ, ջիպեր, ինքնաթիռներում 1-ին կարգ, եւ այլն, եթե հինգ տարվա ընթացքում պետական պաշտոնյաները մի քիչ համեստ ապրեն, այնպիսի օրինականության, կանխատեսելիության դաշտ կստեղծվի, որ կլինեն ներդրումներ, կլինի հայրենադարձություն: Այդ ամենը մենք կանենք պարկեշտ եւ լավ կառավարման ընթացքում, ոչ մի կախարդական փայտիկի կարիք չի լինի: Իսկ եթե մեր հանրային ծառայության հինգ տարիների ընթացքում արտագաղթը գոնե չկանգնի, կարծում եմ՝ «Ժառանգությունը» իր ծրագիրը տապալած կլինի: Եթե ամեն ինչ շարունակվի այնպես, ինչպես կա, մեր դրոշը կմնա ՄԱԿ-ի առջեւում, բայց պետությունը… 1915 թվին 1,5 միլիոն կորցրեցինք, բայց այս քսան տարիների ընթացքում եւս մեկ-մեկուկես միլիոն առանց թշնամու զիջեցինք»:
«Ժառանգությունը» բոլոր այն տեղամասերում, որտեղ մեծամասնական ընտրակարգով ինքը չի առաջադրել թեկնածուներ, պաշտպանելու է ընդդիմության թեկնածուներին: Ինչ վերաբերում է ՀՀԿ-ին չքննադատելու մասին մեղադրանքներին, պարոն Հովհաննիսյանն ասաց, որ իրենք քննադատում են ՀՀԿ-ին, բայց նաեւ քննադատում են կոալիցիայի անդամ մյուս կուսակցություններին:
Մելանյա ԲԱՐՍԵՂՅԱՆ
