Ապրիլի 21-ին Այրում քաղաքում նախընտրական հանդիպման ժամանակ նախագահ Սերժ Սարգսյանն անդրադառնալով Տավուշի մարզում կառավարության իրականացրած ծրագրերին եւ աղքատության հիմնախնդրին՝ հայտարարեց. «Աղքատության մակարդակը Տավուշում ավելի ցածր է, քան հանրապետության մյուս մարզերում եւ նույնիսկ Երեւանում»: Նախագահը հավանաբար այդ եզրակացությանը հանգել է Ազգային վիճակագրական ծառայության տվյալների հիման վրա:
Նշենք, որ Տավուշի մարզի 62 համայնքներից 46-ը սահմանամերձի կարգավիճակ ունեն: Սոցիալական վիճակը հատկապես ծանր է Ադրբեջանի հետ սահմանակից, հեռավոր բնակավայրերում: Մարզում արդյունաբերական խոշոր ձեռնարկություն չկա, վարելահողերի շուրջ կեսը չի մշակվում:Աճեցրած բերքն իրացնելու համար Տավուշում գյուղատնտեսական շուկաներ չկան, Երեւանի շուկան հեռու է, գյուղատնտեսական հումքի,բացառությամբ, ծխախոտի տերեւների եւ խաղողի, մթերման կետեր չկան: Շարունակվում է Տավուշի բնակավայրերից արտագաղթը դեպի Երեւան եւ արտերկիր: Եթե Տավուշում աղքատության մակարդակն ավելի ցածր է, քան Երեւանում, ինչո՞ւ են Տավուշի մարզից Երեւան վերաբնակվում եւ ոչ՝ հակառակը:
Ոսկան ՍԱՐԳՍՅԱՆ
Կարդացեք նաև
