«Ժառանգություն» խմբակցության պատգամավոր Անահիտ Բախշյանը կարծում է, որ «Բարգավաճ Հայաստան» կուսակցության առաջնորդ Գագիկ Ծառուկյանի հեղինակության վրա էապես ազդելու է ընտրողների հետ զինված հանդիպման գնալու փաստը: «Միայն իր դեպքը գիտենք, ուրիշ դեպք չգիտենք, դա լուրջ պետք է ազդի իր հեղինակության վրա: Ցանկացած մեկի հեղինակության վրա կազդի, որ զենքը գոտկատեղին գնում է ժողովրդի հետ հանդիպման՝ քարոզելու՝ եկեք ընտրեք ինձ: Այդ ումի՞ց են վախենում, ի՞նչ վտանգ կա իր համար, ուրեմն ինչ-որ մեկից կամ ահաբեկչությունից վախենում է»,- Aravot.am-ի հետ զրույցում ասաց Ա. Բախշյանը:
Իսկ թե ինչու են «Ժառանգության» քարոզարշավներին քիչ թվով բնակիչներ մասնակցում, տիկին Բախշյանը բացատրեց. «Ես որպես թեկնածու շրջում եմ դռնեդուռ, ով ասելիք ունի ասում է, ով՝չէ, անցնում, գնում եմ: Պետք չունեմ, բոլորին հավաքել: Մենք սովոր ենք մարդկանց հավաքել մի տեղ ու խոսել, բայց դրա մի այլ տարբերակն էլ կա, դու ես գնում ժողովրդի մոտ եւ դա շատ ավելի բնական է լինում քան զանգվածային հավաքները, որ իշխանական լծակներն են անում ամենաբարձր մակարդակով: Այսինքն դասի ժամին երեխաներին, ուսուցիչներին, մանկապարտեզ, համալսարան բոլորին հանում ու տանում են, որ լսեն այն, ինչ ամեն օր լսում են»:
Արփինե ՍԻՄՈՆՅԱՆ
