Երեկ «Ժառանգության» թեկնածուների Գյումրի ոտք դնելուն պես այնպիսի մի հորդառատ անձրեւ սկսվեց, որ ներկաներին մի պահ թվաց, թե հնդկական ֆիլմում են հայտնվել: ՀՀ նախկին արտգործնախարար Ալեքսանդր Արզումանյանը թեեւ իրականում մի լավ նեղսրտեց, որ եղանակի պատճառով իրենց մեծամասամբ ունկնդրում էին լրագրողները, սակայն կատակի տալով՝ հարցրեց. «Չգիտեմ, երեւի եղանակն էլ է հա՞ կոալիցիայի անդամ այս ընթացքում»: Իսկ «Ժառանգության» հիմնադիր Րաֆֆի Հովհաննիսյանը, Համո Սահյանի հայտնի խոսքերը վերափոխելով «Անձրեւն ո՞ւմ շունն է» արտահայտության՝ ոտքից մինչեւ գլուխ թրջվեց: Ու երբ «Ժառանգության» առաջնորդի առողջությամբ անհանգստացած գյումրեցի մի կին փորձեց անձրեւանոց պահել նրա գլխին, վերջինս կտրականապես հրաժարվեց՝ պատճառաբանելով. «Պետք չէ, շնորհակալ եմ, դուք խոսում եք մարդու հետ, ով համեստաբար 15 օր հացադուլ է արել Ազատության հրապարակում: Մեզ համար անձրեւը նորություն չէ, մեզ համար մեռոն է, եւ իմ կարծիքով՝ Հայաստանի ծառա պատգամավորը, նախարարը, մարզպետը, վարչապետը, նախագահը 5 տարի պետք է լինի ժողովրդի հետ, ժողովրդի նման պետք է ապրի՝ առանց անձրեւանոցի, եթե պետք է՝ առանց ապաստանի, առանց դոմիկի, մինչեւ որ ժողովրդի խնդիրը լուծվի»:
Կարդացեք նաև
«Առավոտ» օրաթերթ
