«Այսօր կոմունիստական գաղափարախոսության կարիքը կա ոչ միայն Հայաստանում, այլև ողջ աշխարհում»,-«Հայելի» ակումբում հայտարարեց Հայաստանի Կոմունիստական կուսակցության (ՀԿԿ) միասնական համամասնական ցուցակի 2-րդ հորիզոնականը զբաղեցնող Վազգեն Սաֆարյանը և հավաստիացրեց, որ մեծ ու փոքր չինովնիկները տարբեր կերպ խոչընդոտում են իրենց իշխանության գալուն:
Հայաստանի դեմոկրատական կուսակցության համամասնական ցուցակի երկրորդ հորիզոնականը զբաղեցնող Արմեն Հովսեփյանն էլ նշեց, որ քարոզարշավի ընթացքում կան բազում դժվարություններ: Այնուհետև նկատեց. «Քրիստոմատիաներում ինչքան սեր կա՝ ժողովրդին խոստանում են ազատ շուկայականները, ամերիկամետները, փայտե ձիերով Եվրոպա գնացողները»: Նա նշեց, որ մեր «կալիբրի» տասնյակ երկրներ կան, սակայն նրանից ոչ մեկը այս որակի քարոզարշավ չի անում, այնտեղ չկան այսպիսի ճոխություններ և այլն:
Ա. Հովսեփյանը նշեց, որ Դեմկուսն իր հույսը դրել է ընտրողների չվախեցած, դեպի որևէ ուժ չկողմնորոշված 30 տոկոսի վրա: Aravot.am-ի այն դիտարկմանը, թե այդ նույն 30 տոկոսի վրա բազում այլ կուսակցություններ են հույս դրել , այդ դեպքում արդյոք հնարավոր կլինի՞ այդ մարդկանց քվեի շնորհիվ մուտք գործել խորհրդարան, պարոն Հովսեփյանը պատասխանեց. «Որևէ կուսակցության արգելված չէ հույսեր կապել: Սակայն վստահ ենք, որ անպայման հաղթահարելու ենք հինգ տոկոսի շեմը»: Ա. Հովսեփյանը նաև հավելեց, որ «նորապսակներին, որսորդներին և ընտրապայքարի մեջ մտնողներին թույլատրելի է փոքր-ինչ չափազանցված թվերի ներկայացումը»:
Կարդացեք նաև
Վ. Սաֆարյանն էլ հավաստիացրեց, որ ընտրողների շրջանում կա Կոմկուսի նկատմամբ չթուլացող հետաքրքրություն և իրենք մինչև 15 տոկոսի ակնկալիքներ ունեն:
Տաթև ՀԱՐՈՒԹՅՈՒՆՅԱՆ
