«Բարգավաճ Հայաստան» կուսակցության համամասնական ցուցակում հանգրվանած «Համերաշխություն» կուսակցության նախագահ Սարգիս Ավետիսյանն այսօր Արարատի մարզի Այնթապ համայնքում իր համագյուղացիներին կոչ անելով ձայն տալ ԲՀԿ-ին՝ հայտարարեց, որ ԲՀԿ-ն այն կուսակցությունն է, որը կարող է պատասխանատվություն ստանձնել եւ կրել Հայաստանի Հանրապետության անվտանգության եւ տնտեսական բարգավաճման համար: «Եթե այս իշխանությունը այս կերպ վերարտադրվի», ըստ Ս. Ավետիսյանի, եւս 200 հազար մարդ կլքի Հայաստանը:
ԲՀԿ նախագահ Գագիկ Ծառուկյանի ելույթը, սակայն, ավելի մեղմ տոնայնություն ուներ: Ծառուկյանը ներկայացնելով կուսակցության ծրագիրը, այնթապցիներին կոչ արեց ընտրությունների գնալ եւ քվեարկել խղճի կամոք: Նա ասաց միայն, որ քաջածանոթ է առկա բոլոր խնդիրներին եւ անկախ ընտրությունների արդյունքներից ու ԲՀԿ-ին տրված ձայներից, ներդնելու է իր կարողությունները հանուն բարգավաճ Հայաստանի: «Վերեւից չեմ իջել, մեծահարուստի ընտանիքից չեմ եղել ու անգիր արած բառեր չեմ ասում, պրակտիկորեն ամեն ինչին ծանոթ եմ»,- ասաց Գագիկ Ծառուկյանը, հավաստիացնելով, որ միանգամայն իրատեսական է նաեւ ԲՀԿ-ի նախընտրական ծրագիրը:
Ժողովրդի հետ զրույցներից պարզ դարձավ, որ այստեղ եւս մարդկանց անհանգստացնում է Հայխնայբանկում ներդրած իրենց ավանդների ճակատագիրը:
Նելլի ԳՐԻԳՈՐՅԱՆ
Կարդացեք նաև
