«Եթե մինչև ընտրությունները ամեն ինչ լավ չանցավ, այդ դեպքում ես թքել եմ ցանկացած կոալիցիայի վրա: Ժողովուրդն ինքը պետք է զգա, որ մասնակցել է ընտրություններին»,- այսօր ասուլիսում հայտարարեց ՀԱԿ ներկայացուցիչ, ՀՀՇ վարչության նախագահ Արամ Մանուկյանը:
Դառնալով ՀԱԿ-ի շանսերին` նա նշեց, որ այն այս պահին ունի 70 տոկոս ձայներ, սակայն պետք է հաշվի առնել, որ հասարակությանը ահաբեկում են և այն բավականին վախեցած է:
ԲՀԿ-ի՝ Ռոբերտ Քոչարյանի կողմից ուղղորդվելու մասին էլ պարոն Մանուկյանը ասաց. «Ռոբերտ Քոչարյան գործիչ Հայաստանում վաղուց չկա»: Դառնալով ԲՀԿ-ի վարած քաղաքականությանը՝ նկատեց. «Այն ուժ է, որը փորձում է դառնալ ինքնուրույն: Հաղթանակի դեպքում կջարդվի Սերժ Սարգսյանի քաղաքական մոնոպոլիան»:
Ըստ Ա. Մանուկյանի՝ այժմ մեզանում չեն ընթանում գաղափարական ընտրություններ, ինչը Ռ. Քոչարյանի ավերածության արդյունք է , որից հետո ողջ քաղաքական համակարգը ամորձատվեց: Այնուհետև ՀԱԿ ներկայացուցիչը շարունակեց. «Մեր երկրում չեն կարող գործել սոցիալական ծրագրերը, քանի դեռ Լֆիկ Սամոն հարկ չի վճարում, դատական և արդարադատության համակարգը չի կայանա, քանի դեռ Աղվան Հովսեփյանը Սերժ Սարգսյանի կատարածուն է»:
Կարդացեք նաև
Իսկ խորհրդարանական ընտրությունների արդյունքների կապակցությամբ կանխատեսումներ անելով՝ Ա. Մանուկյանը նշեց. «Սերժ Սարգսյանը ՕԵԿ-ին քցելու է: Արթուրիկին մի պաշտոն կտան, ոչ մի փսոց չի հանի»:
Պարոն Մանուկյանը տեղեկացրեց, որ ընտրություններից հետո ինքը «դռնեդուռ» տեխնոլոգիայի մասին գիրք է գրելու:
Տաթև ՀԱՐՈՒԹՅՈՒՆՅԱՆ
