Տրապիզոնում ընթացող բռնցքամարտի եվրոպական երկրների համար օլիմպիական միակ վարկանիշային մրցաշարում ԱԻԲԱ-ն շարունակում է «ոչ յուրայիններին» մաղելու ավանդական քաղաքականությունը:
Դա հերթական անգամ ցայտուն կերպով արտահայտվեց երեկ կայացած մինչեւ 60 կգ քաշային կարգում Եվրոպայի առաջնության բրոնզե մեդալակիր, գյումրեցի Վլադիմիր Սարուխանյանի եւ շոտլանդացի Ջոշ Թեյլորի մենամարտում:
ՀԱՕԿ-ի լրատվության բաժինը ներկայացրել է այդ դիմակայության ամբողջական պատկերը՝ մրցավայրից մեր հավաքականի երկրորդ մարզիչ Ֆեդյա Ալեքսանյանի պատմածով: «Ամբողջ դահլիճը վանկարկում էր Թեյլոր-Թեյլոր, որին ի պատասխան՝ Վլադիմիրը ռինգում սկսեց իր գործն անել: Նա երեք ռաունդներում անընդհատ հետապնդում էր փախչող շոտլանդացուն՝ դիպուկ հարվածներ հասցնելով: Սակայն կողային մրցավարները ռինգում տեղի ունեցողը «չնկատելով»՝ ամեն անգամ մեկ-երկու միավոր գրանցում էին շոտլանդացու օգտին»,- մարտից անմիջապես հետո Տրապիզոնից հեռախոսով ՀԱՕԿ-ի լրատվական բաժնին պատմել է Ֆեդյա Ալեքսանյանը՝ նշելով, որ այդ պահին մեր պատվիրակության ղեկավար, եվրոպական կոնֆեդերացիայի գործկոմի անդամ, Հայաստանի բռնցքամարտի ֆեդերացիայի 1-ին փոխնախագահ, ՀԱՕԿ-ի փոխնախագահ Դերենիկ Գաբրիելյանն ու հավաքականի գլխավոր մարզիչ Կարեն Աղամալյանը բողոքարկել են մենամարտի արդյունքը եւ այդ պահին գլխավոր մրցավարի մոտ քննարկում են խնդիրը:
Ա. ՀԱԿՈԲՅԱՆ
Կարդացեք նաև
«Առավոտ» օրաթերթ
