Մայրաքաղաքի Ավետիք Իսահակյանի անվան կենտրոնական գրադարանում օրերս նշվեց անվանի բնապահպան, գրող, լրագրող Սուրեն Հայրապետյանի ծննդյան 65-ամյակը եւ կայացավ նրա «Ճախրանքի հմայքը» գրքի շնորհանդեսը: Դահլիճը նաեւ բնաշխարհի լուսանկարների ցուցասրահ էր դարձել: Հոբելյանին շնորհավորեց ու նրա վաստակն արժեւորեց Հայաստանի գրողների միության նախագահ Լեւոն Անանյանը. «Այսօր յուրահատուկ օր է՝ շնորհիվ Սուրեն Հայրապետյանի, զարմանալի անհատականություն, որն արդեն քանի տասնամյակ չի փոխում իր սկզբունքը, չի աղճատում իր բնավորությունը, նա եղել ու մնում է մեր բնության պաշտպանը: Երբ ծառերը, կենդանիները մտնում են Կարմիր գիրք, Կարմիր գիրք են մտնում նաեւ բնության թեմաներով գրողները: Եվ բացառիկ է Սուրենի ներկայությունը, նաեւ այն ժանրային առանձնահատկությունը, որ բերում է նա մեր գրականություն»:
Կոմպոզիտոր, Երեւանի պատվավոր քաղաքացի Մարտին Վարդազարյանը նաեւ իր երաժշտական ողջույնն էր բերել վաղեմի բարեկամին, իսկ վաստակավոր լրագրողներ Տիգրան Լիլոյանն ու Վանիկ Սանթրյանը յուրովի արժեւորեցին Սուրեն Հայրապետյան գրողի ու բնապահպանի գործունեությունը:
Սուրեն Հայրապետյանը շնորհանդեսի ավարտին ասաց. «Ես միայն ձգտում եմ առանց հավելյալ պաճուճանքների ներկայացնել այն, ինչի հեղինակն ինքն է՝ մայր բնությունը: Պետք է միայն կարողանալ ընթերցողին ճշմարտացի եւ իրական փոխանցել այն ամենի զմայլանքն ու կարեւորությունը, ինչն այնքան հարուստ ու բովանդակալից, հոգեզմայլ է դարձնում մարդու կյանքը եւ եռանդ չխնայել դրանք պահպանելու, սերունդներին հասցնելու համար»:
Լ. ՍՈՒՔԻԱՍՅԱՆ
«Առավոտ» օրաթերթ
