Սննդամթերքի անվտանգության ծառայությունը օբյեկտից դուրս առնետներով չի զբաղվում
Բաղրամյան 1 հասցեն, ինչպես բնակիչներն են վստահեցնում, դարձել է առնետների «բույն»: Այս հասցեում գործում է, ժողովրդի լեզվով ասած՝ «պոնչիկ-պերաշկիանոց», որից բուրող հոտն ու սննդամթերքի մնացորդներով լի աղբամանը առնետների համար «տնավորվելու» լավ միջավայր է: «Առավոտին» դիմած Բաղրամյան 1-3 եւ Մոսկովյան 20 շենքերի բնակիչները զարմացած են, որ ամբողջ մայրաքաղաքում ապամոնտաժվեցին գրեթե բոլոր կրպակները, իսկ կարկանդակի այս կրպակը մնաց անձեռնմխելի. «Քանդվեցին նույնիսկ կոշիկի վերանորոգման կրպակները, իսկ այս մեկը, որը սննդամթերքի մշակման ու վաճառքի համար ոչ նորմալ պայմաններում է աշխատում, մնաց որպես անառիկ բերդ: Ընդ որում, կրպակատերը նույնիսկ մի սեղան է տեղադրել այդ մասում, որը կենտրոնական փողոց է: Ամբողջ օրը տհաճ հոտ է տարածվում շրջապատով մեկ, կարծես թե ասիական շուկա լինի: Մայրաքաղաքի ամենագեղեցիկ խաչմերուկներից մեկը վերածվել է փողոցային առեւտրի կետի, որտեղ վխտում են առնետները»:
Սննդի օբյեկտները վերահսկում է գյուղատնտեսության նախարարության սննդամթերքի անվտանգության պետական ծառայությունը, որտեղից էլ փորձեցինք պարզաբանում ստանալ: Ծառայության պետի մամլո խոսնակ Բաբկեն Պիպոյանն «Առավոտին» հայտնեց, որ իրենք նման բողոք չեն ստացել, բայց նաեւ խոստացան, որ իրենց տեսուչը կայցելի տարածք եւ կուսումնասիրի. «Եթե հայտնաբերվի, որ սննդի օբյեկտում իսկապես առնետներ կան, ապա մենք լուրջ միջոցներ կձեռնարկենք»: Իսկ եթե պարզվի, որ առնետները օբյեկտում չեն, այլ հարակից տարածքում, ըստ պարոն Պիպոյանի, ապա դա արդեն ծառայության վերահսկողությունից դուրս է. «Այդ դեպքում մենք կդիմենք պետական համապատասխան մարմինների, որոնք էլ կզբաղվեն այդ խնդրով»:
ՆԵԼԼԻ ԲԱԲԱՅԱՆ
«Առավոտ» օրաթերթ
