Ուկրաինա, Կիեւ - Նախկին վարչապետ Յուլիա Տիմոշենկոն զրուցում է իր աջակիցների հետ դատախազության շենքի մոտ, արխիվային լուսանկար
Հինգշաբթի օրը Ուկրաինայում սկսվում է երկրի նախկին վարչապետ, անազատության մեջ գտնվող Յուլիա Տիմոշենկոյի դեմ հարուցված երկրորդ քրեական գործով դատավարությունը: Ինքը Տիմոշենկոն հրաժարվել է մասնակցել դատական նիստին` պատճառաբանելով, որ վատառողջ է, եւ խնդրել է նիստն անցկացնել իր բացակայությամբ:
51-ամյա Տիմոշենկոն, ով անցյալ տարվա հոկտեմբերին դատապարտվել է 7 տարվա ազատազրկման` Ռուսաստանի հետ 2009 թվականին գազի գնի վերաբերյալ պայմանագրեր կնքելիս իշխանական լիազորությունները չարաշահելու մեղադրանքով, այժմ մեղադրվում է ֆինանսական մեքենայությունների մեջ, որը նա, ըստ դատախազության, կատարել է, երբ ղեկավարում էր «Ուկրաինայի միացյալ էներգետիկ համակարգեր» կորպորացիան:
Տիմոշենկոյի փաստաբանները պնդում են, որ դատական նիստը պետք է հետաձգել` իրենց պաշտպանյալի վատառողջության կապակցությամբ:
Ապրիլի 13-ին գերմանական «Շարիտե» հիվանդանոցի բժիշկները Տիմոշենկոյին զննության են ենթարկել Խարկովի կալանավայրում, ինչից հետո հիվանդանոցի ղեկավարը հայտարարել է, որ նախկին վարչապետը հիվանդ է եւ չի կարող մասնակցել դատական նիստերին:
Կարդացեք նաև
Սպասվում է, որ առաջին դատական նիստերին կմասնակցի մարդու իրավունքների գծով ֆրանսիացի դեսպան Ֆրանսուա Զիմերեն։ Երեկ Ֆրանսիայի արտգործնախարարության խոսնակ Բեռնար Վալերոն մամլո ասուլիսի ժամանակ հայտարարել է, որ դեսպանը երկօրյա այցով մեկնել է Ուկրաինա` մասնակցելու Յուլիա Տիմոշենկոյի դեմ նոր դատական գործի լսումներին:
Վալերոն հայտարարել է, որ նոր դատավարությունը Տիմոշենկոյի դեմ չի ապահովում նրա պաշտպանվելու իրավունքը:
«Ֆրանսիան բազմիցս զգուշացրել է Ուկրաինային, որ չօգտագործի իրավական համակարգը քաղաքական նպատակներով: Մենք վախենում ենք, որ այս դատավարությունը, ինչպես եւ նախորդները, չի ապահովի պաշտպանվելու իրավունքը», – ասել է Ֆրանսիայի արտաքին քաղաքական գերատեսչության խոսնակը:
Վալերոն նաեւ մտահոգություն է հայտնել Ուկրաինայում քաղաքական բանտարկյալների պահման պայմանների վերաբերյալ եւ հավելել, թե Ֆրանսիան եւս մեկ անգամ կոչ է անում Ուկրաինայի կառավարությանը ամբողջովին հարգել մարդու իրավունքները եւ իր ստանձնած միջազգային պարտավորությունները:
Յուլիա Տիմոշենկոյի դուստրը` Եվգենիա Տիմոշենկոն երեկ հանդիպել է Ուկրաինայում հավատարմագրված Եվրամիության դեսպաններին եւ նրանց ներկայացրել վերջին իրադարձությունները, պատմել իր մոր առողջական վիճակի մասին։ Այդ մասին տեղեկացնում է Տիմոշենկոյի պաշտոնական կայքէջը:
Տաթեւիկ Լազարյան
«Ազատություն» ռադիոկայան
