Այսօր «Էրեբունի» պատմահնագիտական արգելոց-թանգարանում նշվեց Հուշարձանների և տեսարժան վայրերի միջազգային օրը` «Համաշխարհային ժառանգության հնագիտական վայրերը» ցուցահանդեսի բացմամբ: Այն այցելուին էր ներկայացնում 15 երկրների 20 հնագիտական վայրեր, որոնք գրանցված են ՅՈՒՆԵՍԿՕ-ի Համաշխարհային ժառանգության ցուցակում: Միջոցառմանը ներկա էին ՅՈՒՆԵՍԿՕ-ի գործերով Հայաստանի ազգային հանձնաժողովի գլխավոր քարտուղար Վահրամ Կաժոյանը, ՀՀ Գլխավոր դատախազ Աղվան Հովսեփյանը : «Մենք կհարատևենք այնքան` որքան պահպանված կլինի եւ կհարատևի մեր ժառանգությունը»,-ասաց դատախազը: Ժառանգության հայ պահապաններին շնորհավորելու էր եկել նաեւ Հայաստանում Հունաստանի Հանրապետության գործերի ժամանակավոր հավատարմատար Վասիլիկի Դիկիպուլոն: Նա կոչ արեց համատեղ ջանքերով նպաստել աշխարհի ժառանգության պահպանությանը: Ցուցահանդեսի այցելուների մեջ էին «Ունիսոն» հ/կ-ի անդամները, որոնք թանգարան մուտք գործեցին թանգարանի կողային ճակատից դեպի ցուցասրահ տանող նորակառույց թեքահարթակով: Թանգարանը հյուրընկալել էր նաև «Փարոս» կամերային երգչախմբին, որի համերգային ծրագիրն ավարտվեց «Էրեբունի Երևան» երգով: Ցուցահանդեսը կգործի մինչև 2012թ. սեպտեմբերի 1-ը:
Լուիզա ՍՈՒՔԻԱՍՅԱՆ
