Այսօր Aravot.am-ը ՀԱԿ համակարգող Լեւոն Զուրաբյանից հետաքրքրվեց` արդեն ստացե՞լ եք ոստիկանությունից պատասխան նամակը, որ իրենք միասնական շտաբին չեն տրամադրելու երկրից բացակա ընտրողների ցուցակը: Երեկ ոստիկանության անձնագրային եւ վիզաների վարչության պետ, ոստիկանության գնդապետ Հովհաննես Քոչարյանը վստահեցրել էր, որ արդեն պատասխանն ուղարկել են եւ չեն պատրաստվում նման տեղեկություն տրամադրել, քանի որ սխալ հասցեով են դիմել, պետք է դիմեին Ազգային վիճծառայություն: Լեւոն Զուրաբյանն ասաց, որ ոչ մի պատասխան էլ իրենք դեռ չեն ստացել. «Մենք նաեւ վարչապետին ենք դիմել եւ նման արդարացման հիմք չկա, թող իզուր չարդարանան: Պետական այլ մարմինների աշխատանքը համակարգում է վարչապետը, ուստի նա կարող է պատասխանել: Մենք անհամբեր սպասում ենք վարչապետի պատասխանին»:
Մեր դիտարկմանը, որ ոստիկանության գնդապետը վստահեցրեց, որ վիճծառայությունը տվյալները կամփոփի միայն 2012-ի հոկտեմբերին, ուստի վարչապետն ամենայն հավանականությամբ այդպես կպատասխանի, պարոն Զուրաբյանը պատասխանեց. «Եթե դուք այդքան մոտ եք վարչապետի հետ ու գիտեք ինչ է նա պատասխանելու` դա ուրիշ հարց է, բայց եկեք ենթադրություններով չառաջնորդվենք: Թող մեզ պատասխանի`կտեսնենք՝ ինչպես կարձագանքենք»:
Հռիփսիմե ՋԵԲԵՋՅԱՆ
