«1972 թվականի նոյեմբերի 16-ին ՅՈՒՆԵՍԿՕ-ի գլխավոր կոնֆերանսը ընդունել է «Մշակութային եւ բնության համաշխարհային ժառանգության պահպանման կոնվեցիան՚, իսկ 1982 թվականին ICOMOS-ի (Հուշարձանների եւ տեսարժան վայրերի պահպանման միջազգային խորհուրդ) առաջարկությամբ, ապրիլի 18-ը նշվում է Հուշարձանների ու տեսարժան վայրերի միջազգային օր: Հայաստանը կոնվեցիային միացել է 1993 թվականի սեպտեմբերի 5-ին՚,- այսօր ՙԵրկու երես՚ ակումբում կազմակերպված ասուլիսի ժամանակ նշեց մշակույթի նախարարության Հուշարձանների պահպանության գործակալության պետ Սերժիկ Առաքելյանը:
Իսկ այդ կառույցի տնօրենի գիտական աշխատանքների գծով տեղակալ Աշոտ Փիլիպոսյանի համար, ապրիլի 18-ը ուղղակի մասնագիտական տոն է: Պարոն Փիլիպոսյանը իր խոսքում նշեց, որ Հայաստանում նկատում է հուշարձանների ու տեսարժան վայրերի միջազգային օրվա հանդեպ մարդկանց հետաքրքրության պակաս: Նաեւ հավելեց. ՙՊաշտպանության նախարարության հետ կնքվել է բանակ-մշակույթ-կրթություն խորագրով պայմանագիր: Դրանով փորձել ենք զինծառայողներին ներգրավել հուշարձանների մաքրման ու պահպանման գործին՚:
Խոսելով այդ ոլորտում առկա խնդիրների մասին, Սերժիկ Առաքելյանը փաստեց՝ ունենք առավել վտանգված 245 հուշարձան. ՙՄեզ հարցնում են՝ դուք գիտեիք, որ նման խնդիր կա: Մենք ասում ենք՝ այո, գիտենք, բայց հնարավորություն չունենք՝ ինչ-որ բան անել: Եթե մասնավոր կազմակերպությունները, բարերարները օգնեին, շատ լավ կլիներ: Հուսով եմ, որ տարեցտարի այդ հուշարձանների թիվը կնվազի՚:
Անդրադառնալով Փակ շուկայում իրականացվող շինարարական աշխատանքներին, պարոն Առաքելյանը ասաց, որ աշխատանքները դադարեցվել են:
Արամ ԱՐԱՐԱՏՅԱՆ
