Այսօր մեր աշխատաշուկայում առավել պահանջված թափուր աշխատատեղերը բժիշկների, հաշվապահների, գանձապահների, բուժքույրերի, ծրագրավորողների, մենեջերների, անասնաբույժների, վաճառողների, մատուցողների, հացթուխների փականագործների, եռակցողների, վերելակավարների, կարող-գործողների, համակարգչային դիզայներների, դասավանդողների եւ մի քանի տասնյակ այլ մասնագիտություններով են: Այսօր «Հենարան» ակումբում, այսպիսի տվյալներ հրապարակեց «Զբաղվածության պետական ծառայություն» գործակալության պետի տեղակալ Արտակ Սիմոնյանը:
Քանի որ պարոն Սիմոնյանի թվարկած մասնագիտությունները ընդգրկում են գրեթե բոլոր ոլորտները, տպավորություն է ստեղծվում, թե մեր երկրում գործազուրկ մարդ չպետք է լինի, սակայն պարզվում է՝ այս պահին ՀՀ-ում աշխատանք է փնտրում 78.6 հազար մարդ:
Aravot.am-ն ընտրելով պարոն Սիմոնյանի թվարկած մասնագիտություններից մեկը, զանգահարեց մայրաքաղաքում գործող տասնյակ խոշոր բուժհիմնարկների կադրերի բաժին, պարզելու՝ ունե՞ն բուժքույրի հաստիքի թափուր տեղ:
«Գրիգոր Նարեկացի» հիվանդանոցում հարցը լսելուն պես միանգամից ասացին` չունենք:
Կարդացեք նաև
«Սուրբ Գրիգոր Լուսավորիչ» բուժկենտրոնից էլ հայտնեցին, որ իրենք միմիայն իրենց քոլեջից են բուժքույրեր ընդունում աշխատանքի: Հարցին, թե այս պահին ունե՞ն բուժքույրի տեղ, կադրերի բաժնի պատասխանատուն ասաց` ոչ:
«Սուրբ Աստվածամայրում» նույնպես ազատ տեղ չկար:
«Պերինտալոգիայի, մանկաբարձության եւ գինեկոլոգիայի կենտրոն» ՓԲԸ-ից (Հանրապետական ծննդատուն) հայտնեցին , որ բուժքույրի կարիք չունեն: «Սրտաբանության ԳՀԻ» բուժհիմնարկում այս պահին տեղ չկար:
«Արաբկիր» բժշկական կենտրոնի կադրերի բաժնից էլ վստահեցրին, որ ծանոթ-բարեկամի հանգամանքը կապ չունի, եթե բուժքույրի կարիք են ունենում՝ քննությունը բարեհաջող հանձնելու դեպքում ընդունվում են աշխատանքի: Սակայն հույս չտվեցին, որ առաջիկայում բուժքույրի տեղ կազատվի:
Ինչ վերաբերում է թաքնված զբաղվածներին, որոնք 18 հազար դրամ գործազրկության նպաստ են ստանում, բայց գործակալությունից գաղտնի աշխատում են՝ Aravot.am-ի հարցին, թե կա՞ն մեխանիզմներ նրանց հայտնաբերելու, պարոն Սիմոնյանն ասաց.
«Թաքնված զբաղվածներին մի քիչ դժվար է հայտնաբերելը, ուղղակի օրենքով կան սահմանված որոշակի վարչական գործառույթներ: Եթե մարդը թաքնված զբաղված է, նա կսկսի խուսափել մեր կողմից առաջարկվող ծրագրերին ընդգրկվել, ժամանակ չի ունենա այցելել զբաղվածության կենտրոն՝ աշխատանք ստանալու համար եւ այդպիսով պարզ կդառնա, որ նա աշխատում է ու նրա նպաստը կդադարեցվի»: Պետի տեղակալի տվյալներով, տարբեր հետազոտական աղբյուրների համաձայն՝ այսօր թաքնված զբաղվածները մինչեւ 40%-են կազմում:
Նկատենք, որ գործակալությունը նպաստը կտրում է, եթե գործազուրկ քաղաքացին հրաժարվում է նրա առաջարկած աշխատանքից: Քաղաքացիները պատճառաբանում են, որ, սովորաբար, այս կամ այն գործի համար նրանց առաջարկվում է ընդամենը 32 հազար դրամ նվազագույն աշխատավարձ: Aravot.am-ի հարցին, թե գուցե միտումնավո՞ր են այդքան աշխատավարձով աշխատանք առաջարկում, որ մարդը հրաժարվի ու նպաստից զրկվի, պարոն Սիմոնյանն ասաց. «Եթե գործազուրկը չունի կոնկրետ մասնագիտություն, նրան հարմար է ցանկացած աշխատանք: Իսկ եթե այդ աշխատանքը մասնագիտական առումով գործազուրկին հարմար է եւ նա հրաժարվում է, ապա առաջին անգամ մենք կասեցնում ենք նպաստը երկու ամսով
եւ 2-րդ անգամ հրաժարվելու դեպքում դադարեցնում ենք նրա նպաստի վճարումը: Երբ մենք ֆիքսում ենք գործազուրկի կարգավիճակը, այնտեղ կա կարեւոր մի պայման, մարդը պետք է պատրաստ լինի անցնել աշխատանքի: Գործատուն էլ օգտվելով առիթից, որպես կանոն՝ առաջարկում է ցածր աշխատավարձ»:
Լուսինե ԲՈՒԴԱՂՅԱՆ
