Քաղաքական տեխնոլոգ Կարեն Քոչարյանը, Aravot.am-ի հետ զրույցում անդրադառնալով մասնավորապես «Օրինաց երկիր» կուսակցության քարոզարշավին եւ նոր գումարման ԱԺ-ում հայտնվելու նրա հնարավորությանը, կարծիք հայտնեց, թե, որպես՝ իշխանական ուժ, ՕԵԿ-ի քարոզարշավը պասիվ է: «ՕԵԿ-ը, ճիշտ է, իրեն պատռում է, փորձում է ինչ-որ բաներ անել, բայց, դե, ՕԵԿ-ին դնենք մի կողմ»,- այս կուսակցության նկատմամբ նկատելի անտարբերությամբ ասաց Քոչարյանը՝ հավելելով, որ ՕԵԿ-ն ինքն է մամուլում շրջանառության մեջ դնում ինչ-որ թվեր, ներկայացնում ապագա խորհրդարանի պատկերը, որտեղ ՕԵԿ-ն, իբր, առնվազն 16 տոկոս քվե է ունենալու: Բայց քաղտեխնոլոգի համոզմամբ, իրականությանն ավելի մոտ են բոլոր այն հարցումները, վերլուծություններն ու կանխատեսումները, որտեղ ՕԵԿ-ն անցնում է 5 տոկոսանոց սահմանը կամ չի անցնում: «Մնացած դեպքերում, պարզ է, որ այդ ինֆորմացիան անձամբ Արթուր Բաղդասարյանն ինքն է շրջանառության մեջ դնում, որովհետեւ ոչ մի փորձագետ՝ անկախ , իշխանական կամ ընդդիմադիր, տեսախցիկի առաջ չի կանգնի եւ չի ասի, որ ՕԵԿ-ը կարող է 5 տոկոսից ավելի ձայն հավաքել՝ դա լավագույն դեպքում: Բայց « ի դեմս» ( նկատի ուներ ՕԵԿ փոխնախագահ Հեղինե Բիշարյանի լեզվի սայթաքումը, երբ վերջինս հայտարարել էր, թե՝ ի դեմս Արթուր Բաղդասարյանի, կուսակցությունում կանայք շատ են- խմբ.) արթուրբաղդասարյանները գնում են քարոզարշավի, ինչ-որ բան են փորձում անել, ջեմեր են բաժանում… ՕԵԿ-ը սա է»,- հեգնեց Կարեն Քոչարյանը:
Արդեն որպես՝ շարքային քաղաքացի եւ ոչ քաղտեխնոլոգ, Կարեն Քոչարյանն ասաց, թե իրեն ընդհանրապես ոչ միայն նախընտրական, այլեւ ընդհանուր քաղաքական մթնոլորտն ու քաղաքական դաշտի ավերված վիճակը չեն բավարարում: «Քաղաքական դաշտ չթողեցին, ավերեցին: 1990-ականներին պայքարը քաղաքական էր՝ ՀՀՇ, ՀՅԴ, ԱԻՄ, ԱԺՄ, ՍԻՄ, ՀՀԿ եւ այլն: 2000-ականներին քաղաքական դաշտը սկսեց ամբողջովին փոշիանալ: Այսօր Հայաստանում ռեալ եւ դասական իմաստով գործում է մի կուսակցություն՝ ՀՅԴ-ն, որն ապացուցել է, որ կարող է լինել եւ եղել է ընդդիմություն, հետո իշխանություն, հետո նորից ընդդիմություն եւ դրանից չի քանդվել ու լինելով իշխանություն՝ նաեւ նրա անդամների թիվը չի ավելացել: ՀՅԴ-ն ունի այն դասական կուսակցության՝ համաշխարհային քաղաքական այն բոլոր ատրիբուտները, որոնք պետք է ունենա կուսակցությունը: Մնացած բոլորը կամ՝ իշխանության կուսակցություններ են, կամ՝ մեկանգամյա պրոյեկտներ, գոնե, այս պահին: Ի՞նչ է նշանակում 300-400 հազար անդամ ունենալ»,- հռետորական հարցադրում արեց Քոչարյանն ու կարծիք հայտնեց, թե քաղաքական ուժերն իրենք էլ չեն հասկանում, որ հայտարարված այդ թվերը հենց իրենց դեմ են աշխատում, «եւ նախորդ ընտրություններում դա աշխատեց ԲՀԿ-ի, ՕԵԿ-ի դեմ»: Քաղտեխնոլոգը նկատի ուներ այն, որ այդ երկու կուսակցությունները նախորդ ընտրությունների ժամանակ անհամեմատ ավելի քիչ քվե ստացան, քան՝ իրենց հռչակած կուսակցականների թիվն էր:
