Նախկին արտգործնախարար Վարդան Օսկանյանի «նախաձեռնած» ԲՀԿ-ՀՀԿ բանավեճը նոր փուլ է մտնում: Օսկանյանի՝ գործող կառավարության հասցեին հնչեցրած վերջին քննադատության առիթով ՀՀԿ-ականներ Հովհաննես Սահակյանի եւ Գագիկ Մելիքյանի՝ ԲՀԿ համամասնական ցուցակի 20-րդ հորիզոնականը զբաղեցնող Տիգրան Ուրիխանյանի հասցեին հնչեցրած անձնական վիրավորանքներին երեկ «Առավոտի» հետ զրույցում պատասխանեց ԲՀԿ համամասնական ցուցակի 148-րդ հորիզոնականը զբաղեցնող Արսեն Մկրտչյանը: «Շատ ավելի ծանրակշիռ է լինել ԲՀԿ-ի շարքային անդամ, քան ՀՀԿ-ի 110-րդ, 114-րդ կամ որեւէ այլ՝ ոչ կոռեկտ, ագրեսիվ, սեփական հայրենակիցների դեմ անհանդուրժողականությամբ լցված թեկնածու: Ուզում եմ ընդգծել, ՀՀԿ-ի որոշ պատգամավորներ անձնական զինանոցում չունենալով ինտելեկտուալ պաշար, քաղաքավարության եւ ցիվիլ բանավեճի ունակություն՝ հարկադրված գործածում են իրենց միակ ունակությունը՝ մարդկանց անձնական վիրավորանքներ հասցնելը: Թող ժողովուրդը հետեւություններ անի այդ թեկնածուների մասին»,- ասաց նա:
«Առավոտ» օրաթերթ
