Օրեր առաջ «Հայաստանի եվրոպացի բարեկամներ»-ի հրապարակած սոցհարցումներով ԲՀԿ-ն խորհրդարանական ընտրություններում հաղթելու ամենամեծ շանսերն ուներ:
Երեկ հրապարակված` «Գելափ»-ի սոցիոլոգիական հետազոտության արդյունքներով` արդեն ՀՀԿ-ի հաղթանակը գրեթե ապահովված է համարվում ` հաշվի առնելով երկրորդ տեղում ընթացող ԲՀԿ-ի նկատմամբ, իբր, ունեցած առավելությունը, իսկ ՕԵԿ-ը գրեթե նույնքան ընտրող ունի, որքան նախորդ ընտրություններում:
Մեզ փորձում են համոզել, որ կա՛մ մի քանի օր քնել-արթնանալուց հետո ընտրողները հանկարծ հայտնագործել են, որ ուղնուծուծով հավատացյալ Հանրապետական կամ ՕԵԿ-ական են դարձել, կա՛մ էլ նրանք այնպիսի շռնդալից քարոզարշավ են անցկացրել, որ հասել են նման շոշափելի արդյունքների: Դա այն դեպքում, երբ ՕԵԿ-ի ջեմախառն ընտրարշավը պարզապես խղճահարություն է առաջացնում, իսկ ՀՀԿ-ինը` բոլորի աչքի առաջ իր գորշությամբ ու միօրինակությամբ ոչ միայն ոչնչով չի զիջում մի քանի այլ ուժերի քարոզարշավին, այլև գերազանցում է:
Պատվիրված սոցհարցումները քարոզարշավի հիմնական զենքերից մեկն են: Սակայն այս դեպքում դրանք ոչ թե իշխանության ունեցած ժողովրդականությունն ու վարկանիշը բարձրացնելու նպատակ են հետապնդում, այլ վարժեցնում են հանրությանը, թե ապագա խորհրդարանն ինչ տեսք կունենա: Որովհետև «Գելափ»-ը փաստացի նկարել է այն սահմանային վիճակը, որը բավարարում է ՀՀԿ-ին` ՕԵԿ-ի հետ միասին մեծամասնություն կազմելու:
«Երկիր»
