Այսօր ՀՀ վարչապետ Տիգրան Սարգսյանն ու Բելառուսի արտաքին գործերի նախարար Սերգեյ Մարտինովը կառավարությունում հանդիպման ժամանակ, ի թիվս այլ հարցերի, քննարկել են նաեւ մայրաքաղաքի ավտոբուսային պարկը եւ վերելակային տնտեսությունը բելառուսական ավտոբուսներով ու վերելակներով համալրելու հարցը:
Բելառուսները պատրաստվում են նվե՞ր տալ ավտոբուսներն ու վերելակները, Aravot.am-ի հարցին կառավարությունից հայտնեցին, որ առայժմ հարցը քննարկման փուլում է եւ «ավելին ոչինչ չեն կարող ասել»:
Այսօր մայրաքաղաքում առաջնային փոփոխման ենթակա մոտ 1800 վերելակ կա, ինչի համար, մասնագետների հավաստմամբ, կպահանջվի մի քանի միլիարդ դրամ:
Երեւանի քաղաքապետարանի կոմունալ տնտեսության վարչության մասնագետ Հայկազ Ավետիսյանի խոսքերով, ամենամեծ վտանգն այսօր ներկայացնում են 71 ցանցավոր վերելակները. «Դրանք այն վերելակներն են, որոնց դուռը դեպի դուրս է բացվում: Միայն դրանց փոխելը մի քանի միլիարդ դրամի հարց է: Ճիշտ է, 2007 թվականին կառավարությունը քաղաքապետարանին 3 միլիարդ դրամ հատկացրեց եւ այդ գումարով վերանորոգվեց 2464 վերելակ, բայց դեռեւս հազարավոր վերելակների շահագործումը խիստ վտանգավոր է»:
Ինչ վերաբերում է չաշխատող վերելակներին, ապա քաղաքապետարանի մասնագետը հայտնեց, որ դրանք հիմնականում բեռնատար վերելակներն են, որոնք խորհրդային տարիներին աշխատել են մարդատարին զուգահեռ:
Կարդացեք նաև
Լուսինե ԲՈՒԴԱՂՅԱՆ
