Այսօր Վալերի Բրյուսովի անվան պետական լեզվաբանական համալսարանում կայացավ հանդիպում ամերիկացի երգիչ, հայ ազգի բարեկամ Դանիել Դեքերի հետ: Ամերիկացի երգիչն ասաց, որ հետաքրքրվել է հայոց պատմությամբ. «Լինելով քրիստոնյա, ինձ հետաքրքրեց ամեն ինչ` կապված հայերի հետ` քրիստոնեության ընդունումից մինչև Մաշտոց»: Ներկաների հետ կիսվելով Հայաստան կատարած իր այցից, արվեստագետը նշեց, որ հիացած է հայկական ճարտարապետությամբ:
Հանդիպմանը ներկա էր նաեւ կոմպոզիտոր Արա Գևորգյանը, որն իր խոսքում փաստեց Դանիել Դեքերի` Հայոց ցեղասպանության ընդունման մեջ կատարած աշխատանքները. «Այսօր շատերը փորձում են նմանակել ուրիշ ազգերին նույնիսկ երգերով, բայց այս դեպքում կա մեկը, ով երգում է մեր երգերը: Խոսքը Դանիել Դեքերի մասին է: Նա թողարկել է ձայնասկավառակ` Դանիել Դեքերյան անունով, որտեղ զետեղված երգերը միայն հայերեն են»:
Պարոն Գևորգյանը խոսելով Դեքերի հետ իրենց հետագա անելիքների մասին՝ ասաց, որ ցանկանում են 20 տարբեր լեզուներով կատարվող «Ադանա» երգը այս տարի հնչեցնել սիմվոլիկ 15 լեզուներով ՝ ի նշան 1915 թվականի տխուր տարելիցի: Դրանից հետո էլ կկազմակերպեն տուրեր. այդ երգը կատարող երգիչներից յուրաքանչյուրը այն կհնչեցնի իր երկրում՝ իր լեզվով:
Արամ ԱՐԱՐԱՏՅԱՆ
