Թեեւ երեկվանից բոլոր կայքերն ահազանգում են Մալաթիա-Սեբաստիա համայնքում ՀԱԿ ներկայացուցիչ Նիկոլ Փաշինյանի հանդիպման ժամանակ տեղի ունեցած միջադեպի մասին, ինքը՝ պատգամավորի թեկնածուն էլ ահազանգել է ոստիկանություն, ՀՀԿ փոխնախագահ Գալուստ Սահակյանն ասաց, որ անտեղյակ է միջադեպից:
Հիշեցնենք, որ թիվ 7 ընտրատարածքում մեծամասնական ընտրակարգով առաջադրված թեկնածուներն են ՀՀԿ-ի կողմից հայտնի գործարար Սամվել Ալեքսանյանը, ՀԱԿ-ի կողմից՝ «Հայկական ժամանակ» թերթի գլխավոր խմբագիր Նիկոլ Փաշինյանը: Երեկ ընտրողների հետ Փաշինյանի հանդիպման ժամանակ Ալեքսանյանի կողմնակից կանայք փորձել են խանգարել Փաշինյանի հանդիպումը, իսկ ավելի ուշ՝ ժամը 19-ին սահմաններում Հարավ-Արեւմտյան թաղամասում դաժան ծեծի է ենթարկվել պատգամավորության թեկնածու, ընդդիմադիր Հայ ազգային կոնգրեսի համամասնական ընտրացուցակի 77-րդ համարը զբաղեցնող Բաբկեն Գարոյանը: Ականատեսների վկայությամբ, հարձակվողները եղել են թիվ 7 ընտրատարածքում առաջադրված, հանրապետական թեկնածու Սամվել Ալեքսանյանի մտերիմները:
Aaravot.am-ն այս առնչությամբ փորձեց մեկնաբանություններ ստանալ կարկառուն ՀՀԿ-ական Գալուստ Սահակյանից: Նրա հետ զրույցը ներկայացնում ենք ամբողջությամբ.
– Տեղեկություն չունեմ: Բայց խնդիրն ի՞նչ է:
Կարդացեք նաև
– Նիկոլի հանդիպման ժամանակ Ալեքսանյանի կողմնակից կանայք հարձակվել են նրա վրա, քաշքշել են…
–Բայց նրանց անձնագրերին գրված է, որ Ալեքսանյանի կողմնակիցնե՞րն են:
– Իրենք ասել են, որ Ալեքսանյանի կողմնակիցներն են:
– Եթե մարդիկ կողմնորոշում ունեն ընտրելու՝ դա չի նշանակում կողմնակիցներն են:
– Կողմնորոշումը՝ կողմնորոշում, բայց թեկնածուի վրա հարձակվելը…
– Ինձ թվում է, դեռ էդպիսի բաներ շատ կլինեն: Դա յուրահատուկ ձեռագիր է, որը այս տարիների ընթացքում փորձում են շահարկման մեջ դնել:
– Այսինքն, Դուք ակնարկում ենք, որ Նիկոլի կողմի՞ց է դա կազմակերպվել:
– Ես ակնարկում եմ, որ ըստ էության, երեւի որեւէ բան էլ չի այդպես տեղի ունեցել: Ընտրություններ են, մի տեղ հաջողվում է, մի տեղ չի հաջողվում: Մենք էլ ենք գնում այս կողմ, այն կողմ, ինչ–որ տեղ խոսակցություններ են լինում, կարող է նաեւ նման միջադեպեր լինեն, բայց դա դարձնել այսպես քարոզչության նյութ, բնականաբար, մեր ճաշակի հետ չի համընկնում:
– Բայց ոչ մի տեղ ՀՀԿ-ի կողմնակիցների քիթը չեն կոտրել:
– Ո՞նց, էս չորս տարի է անընդհատ միտինգներ են ձեւավորում, ինչ ասես չեն ասում, ի՞նչ քիթը կոտրելու մասին ա խոսքը:
– Նկատի ունեմ, որ ֆիզիկական վնաս չեն հասցրել:
– Նիկոլ Փաշինյանի՞ քիթն են կոտրել:
– Ոչ, ՀԱԿ-ի կողմնակիցներից մեկի:
– Ես չեմ կարող մեկնաբանել, կանխավարկածային ինչ–որ բան եք ասում: (Սահակյանը քմծիծաղ է տալիս.- Ն. Գ.)
– Կանխավարկածային չի, մարդիկ ոստիկանությանն էլ են ահազանգել:
– Չգիտեմ միջադեպն ինչպես է եղել, ինչպիսի շարժառիթ է եղել: Ես չեմ կարծում որեւէ մեկի քիթը, եթե քիթը որեւէ տեղ չի մտցրել, կոտրեն: Դրա համար բնութագիրը պետք է լրիվ լինի, որ կարողանամ գնահատական տալ:
Նելլի ԳՐԻԳՈՐՅԱՆ
