«Էկոլոգիական անվտանգության ապահովման եւ ժողովրդավարության զարգացման» հ/կ-ն պատրաստվում է դիմել կառավարություն: Ըստ կազմակերպության նախագահ Ռաֆայել Ասրյանի` «Հայջրմուղկոյուղի» ՓԲԸ-ն նոր պայմանագրեր է տրամադրել մարզկենտրոնի 22 բաժանորդների, որի մեջ կատարած փոփոխություններով, մասնավորապես` հանել է կեղտաջրերի հեռացման ու մաքրման կետը` խախտելով ջրային օրենսգրքի մի շարք կետեր եւ 2004թ. կառավարության N130 որոշումը:
««Կառավարության տվյալ որոշման մեջ ամրագրված խմելու ջրի մատակարարման եւ ջրահեռացման ծառայությունների մատուցման (բնակիչ-բաժանորդների համար) օրինակելի պայմանագրի համաձայն` ջրամատակարարը պարտավոր է կատարել բաժանորդի կեղտաջրերի հեռացումն ու մաքրումը` պայմանագրով նախատեսված քանակին ու որակին (բաղադրությանը) համապատասխան: «Հայջրմուղկոյուղի» ՓԲԸ-ն չի կատարում բաժանորդների հետ կնքված պայմանագրային պարտավորությունները` չի ապահովում կենցաղային կեղտաջրերի հեռացումն ու մաքրումը: Ընկերությունը փոխանակ կատարի իր պարտականությունները, կեղծում է ՀՀ կառավարության որոշումները եւ չի ենթարկվում ՀՀ ջրային օրենսգրքի կետերին: Մտադիր ենք դիմել կառավարությանը, որպեսզի հետամուտ լինի այդ հարցին, թույլ չտա ոտնահարվեն ՀՀ բնակիչների իրավունքները, քանի որ «Սաուր» ընկերությունը ջրամատակարարման ոլորտի պայմանագրերը կնքել է կառավարության հետ», – նշում է Ռ. Ասրյանը: Ըստ նրա, նոր պայմանագրերը տրամադրվել են այն բաժանորդներին, ովքեր դիմել էին դատարան` «Հայջրմուղկոյուղի» ՓԲԸ-ից պահանջելով պայմանագրում նշված կետերը կատարել եւ չառաջացնել բնապահպանական խնդիրներ: Սյունիքի մարզի ընդհանուր իրավասության դատարանը եւ ՀՀ վերաքնիչ դատարանը բաժանորդների հայցը բավարարել են: Պատասխանող կողմը բողոքարկել է, այժմ գործը Վճռաբեկ դատարանում է:
«Հայջրմուղկոյուղու» հարավային մասնաճյուղի մամուլի ծառայությունից պարզաբանում են, որ մինչեւ այժմ գործել են կառավարության կողմից սահմանված տիպային պայմանագրերը: «Իսկ Հայաստանում գործունեություն են ծավալում այս ոլորտին առնչվող մի շարք կազմակերպություններ, որոնց մեծ մասն ունի մաքրման կայաններ եւ նրանք այդ տիպային պայմանագրերով են առաջնորդվել: Բայց քանի որ «Հայջրմուղկոյուղին» Կապանում չունի մաքրման կայան, դրա համար նոր պայմանագրի մեջ (որը տեղայնացվել է) «Հայջրմուղկոյուղին» հանել է «մաքրման» բառը, որովհետեւ այդ ծառայությունը չի իրականացվում», – նշում են մամուլի ծառայությունից:
Մերի ՍՈՂՈՄՈՆՅԱՆ
