Aravot.am-ի հետ զրույցում Հայաստանի դեմոկրատական կուսակցության առաջնորդ Արամ Սարգսյանն ասաց, որ պարզ է ` իրենք չեն կարող պայքարել ընտրակաշառքի դեմ, բայց կարող են մարդկանց բացատրել, որ չարժե ընտրակաշառք վերցնելով գնալ իր ուզածին քվեարկել:
Ըստ քաղաքական գործչի, դրա համար իրենք գերադասում են աշխատել ընտրազանգվածի 30-40 տոկոսի, այսինքն արժանապատվություն ունեցող, ոչ նվաստ մարդկանց հետ: «Ժողովուրդը պիտի գաղափարախոսության ու ծրագրի համար ձայն տա, ոչ թե քսակի պարունակության: Բա ինչի՞ համար տա, նրա համա՞ր, որ այսօր գալիս սերմացու, չգիտեմ 40 կիլո գարի՞ է բաժանում, դրա համար պիտի, հա՞, ձայն տա: Նա գնում է խորհրդարան՝ խորհրդարանական գործունեությամբ զբաղվելու, որտեղի՞ց նրան այդ փողը, որ բաժանում է: Կարո՞ղ է Ֆրանսիայում որևէ մեկը վեր կենա , ասի` ես ձեզ մի «յաչեյկա» ձու եմ տալիս, որ գաք, ինձ քվեարկեք, ձայն տաք: Պատկերացնու՞մ եք այդպիսի երևույթ, բա ամոթ չէ՞ մեզ»,- նեղստրեց Արամ Սարգսյանը:
Նշենք, որ թեև ՀԴԿ առաջնորդը սերմնացու բաժանողի անունը չտվեց, սակայն այդ քանակությամբ գարի իր ընտրազանգվածին բաժանում է ԱԺ փոխնախագահ Սամվել Բալասանյանը, որի համար էլ գյուղացիներն իրար գլուխ են ջարդում:
Նունե ԱՐԵՎՇԱՏՅԱՆ
