ՀՀ կրթության և գիտության նախարար Արմեն Աշոտյանը, ընդունելով ուսանողների և դասախոս Նարինե Մկրտչյանի առաջարկությունը, Երևանի Պետական Համալսարանի Միջազգային հարաբերությունների ֆակուլտետում հանդես է եկել դասախոսությամբ՝ վարելով Հանրային կառավարում բաժնի «PR» դասը: Նախարարը դասախոսությունն սկսել է քվեարկությամբ՝ ովքեր են կողմ բուհական համակարգի ներկա բարեփոխումներին: Կողմ ձայները մի քանիսով ավելի են եղել «դեմ»-ից, սակայն ավելի շատ են եղել չկողմնորոշվածները:«Կրթական «PR»-ի խնդիրն է ապացուցել, հիմնավորել, համոզիչ բացատրել, որ բուհական համակարգի բարեփոխումները Հայաստանում ընթանում են ճիշտ ճանապարհով, որպեսզի այս լսարանում չկողմնորոշված ուսանողների մոտ ձևավորվի այդ տեսակետը»,- նշել է ԿԳ նախարարը: Դասախոսության ընթացքում Արմեն Աշտյանն ներկայացրել է կրթական բարեփոխումները, ընդունված նոր ուսանողակենտրոն կարգերը, Եվրոպական կրթական տարածքում հայկական կրթական համակարգի ներգրավման միտումները, այս ուղղությամբ կատարված աշխատանքներն ու նախատեսվող անելիքները: « Ես համոզված եմ, որ մեր կրթական համակարգը ճիշտ ճանապարհով է առաջ գնում, այլ հարց է, որ այդ քայլերի տեմպերը բավականաչափ արագ չեն»,- ընդգծել է Արմեն Աշոտյանը:
Կարևորելով կրթություն-տնտեսություն կապը՝ ՀՀ ԿԳ նախարարը համոզմունք է հայտնել, որ բուհական համակարգի համար իրական պահանջարկը, պետք է ձևավորի տնտեսությունը: «Ցավոք, Հայաստանի տնտեսությունում դեռ չի ձևավորվել գիտելիքով զինված որակյալ մասնագետների իրական և հստակ պահանջարկ. Առաջին հերթին պետք է ձևավորվի տնտեսականը, ինչն էլ ուղղակիորեն կազդի կրթության որակի վրա: Բայց մյուս կողմից հետզհետե շատանում է այն երիտասարդների թիվը, ովքեր կարողանում են գիտելիքով և մասնագիտական բարձր որակներով հաջողության ճանապարհ հարթել իրենց համար»,- նշել է Արմեն Աշոտյանը: Նախարարը պատասխանել է նաև ուսանողների հարցերին, որոնք վերաբերել են բուհական համակարգի բարեփոխումներին, Բոլոնիայի գործընթացին, 12 -ամյա կրթական համակարգի ներդրմանը, Երևանի Բրյուսովի անվան լեզվաբանական համալսարանի ռեկտորի և ԿԳ նախարարության հանրային մեծ հնչեղություն ստացած հարաբերություններին և այլ խնդիրների:
ՀՀ կրթության և գիտության նախարարություն
