Քիչ առաջ Aravot.am-ի հետ զրույցում ԱԺ պատգամավոր, ԲՀԿ Շիրակի մարզային կառույցի պատասխանատու Մարտուն Գրիգորյանը, անդրադառնալով Գյումրու քաղաքապետ Վարդան Ղուկասյանի դստեր փեսացուի սպանությանը, վստահեցրեց, որ իր թիմը այս դեպքի հետ որևէ կապ չունի:
Ավելին, ըստ նրա, իր ընտանիքը մտերիմ է ինչպես Ղուկասյանի դստեր սպանված փեսացուի` Եսայանների ընտանիքի հետ, այնպես էլ կասկածյալի: Հիշեցենք, որ սպանության մեջ կասկածվում է Անի տարածաշրջանի նախկին ոստիկանապետ Սամվել Սարգսյանի որդին` Հարությունը:
«Մենք Հարությունի հետ քավոր-սանիկական կապեր չունենք, ավելին ասեմ` Հարությունը նույնիսկ կնքված չէ, ես ճշտել եմ: Ինչ մնում է էս ամեն ինչը բերել, մեզ հետ կապել, սա ես ճիշտ չեմ համարում, սա բարոյական չէ: էս պահին դրությամբ, էս օրերին մենք լծված ենք մի շատ կարևոր գործի. նախընտրական քարոզարշավ է, մենք մեր գործով ենք զբաղվում ու այստեղից ես ավելի շատ պատվերի հոտ եմ առնում, քան իրականության: Լավ գիտենք պայքար է, պայքարի մեջ ենք, նմանատիպ բաներ կապել իմ անձի հետ, իմ անձը վարկաբեկել ճիշտ չէ, ես միշտ ասում եմ` քաղաքը փոքր է, մեկս մյուսիս ճանաչում ենք, լավ խորանալու պարագայում կպարզվի, որ շատ շատերս իրար բարեկամ դուրս կգանք», -ասում է պատգամավորը :
Ըստ նրա, իրենք երկու ընտանիքների հետ էլ ջերմ, շատ մոտ հարաբերությունների մեջ են. «Լավ ճանաչում եմ երկու ընտանիքներին էլ `տուժողին էլ եմ ճանաչում, տուժողի քեռիները`Արմեն ու Ապերը շատ մոտ են եղել իմ հորեղբոր հետ, Կարենի մորը` Անահիտին շատ եմ հարգում, մայրը մեր թաղից է, էս ամեն ինչ դուրս գալով` ես ոչ մի խնդիր չեմ տեսնում, որ մենք` «Բարգավաճ Հայաստան» կուսակցությունը կամ ես ինչ-որ կապ ունենանք: Փոխադարձ հարգանք է եղել, նույնը Հարությունենց ընտանիքի հետ, երկուսն էլ մոտ են, ես չգիտեմ Հարությունը կասկածյա՞լ է , վկա՞ է, տեղյակ չեմ գործի ընթացքից, բայց լսել եմ ոստիկանապետի հարցազրույցը, ով ասել է, որ դա քաղաքականության հետ կապ չունի: Ես շատ եմ ցավում, որ մեր քաղաքում նման դեպք է եղել»:
Կարդացեք նաև
ԲՀԿ-ական պատգամավորը հստակ պատվեր է համարում իրենց ու քաղաքապետի թիմի մեջ թշնամանք սերմանելը: «Ես ասել եմ քաղաքապետի հետ, քաղաքապետի ընտանիքի հետ մենք թշնամիներ չենք, մենք 2008 թվականին եղել ենք քաղաքական հակառակորդներ: Էսօր ես ամեն ինչը նույն լրագրողների կամ չգիտեմ ինչի միջոցով տանել դեպի թշնամանքի, որ մենք եղել ենք թշնամիներ… ես ասում եմ` ես էս քաղաքի մեջ թշնամիներ չունեմ, ոչ մեկի հետ թշնամություն չունեմ: Դա արհեստական սարքվում է, ես խորհուրդ չէի տա դա կապել քաղաքում ինչ-որ թշնամիների հետ: Հասկանում եմ` սուգ է, վիշտ է, ես չեմ կարծում, որ քաղաքում գտնվի մեկը, ով որ ես փաստերից ուրախանա, սա մեր քաղաքի պատվի հարցն է դառնում, նմանիպ բաներ չպիտի լինի, մանավանդ այս ելքով ավարտ ու երիտասարդ մարդկանց մեջ», -ասում է ԲՀԿ-ական պատգամավորը:
Ի դեպ, Գյումրու քաղաքապետը լրատվամիջոցներից մեկով հայտարարել էր, որ այս սպանությունը կատարվել է քաղաքական հողի վրա և նշել էր, որ բոլոր ձերբակալվածները ԲՀԿ շտաբի կարկառուն անդամներն են: Վարդան Ղուկասյանի այս հայտարարությունը արդեն իսկ դատապարտել է «Տապան» անկախ փորձագետների ասոցիացիայի համակարգող Վահագն Պետրոսյանը:
Նունե ԱՐԵՎՇԱՏՅԱՆ
