«Մենք իսկապես բազմազանություն ենք ապահովում»,-այսօր հայտարարեց թիվ 7 ընտրատարածքում մեծամասնական ընտրակարգով առաջադրված Տիգրան Գրիգորյանը՝ վերջ դնելով այն խոսակցություններին, թե ինքն ընդամենը առաջադրվել է մասնակցության համար, քանի որ իրական պայքարը գնալու է նույն ընտրատարածքում առաջադրված թեկնածուներ Սամվել Ալեքսանյանի եւ Նիկոլ Փաշինյանի միջեւ:
Պարոն Գրիգորյանը սիմվոլիկ ֆինանսական ներդրում կատարեց՝ 1000-ական դրամ փոխանցելով իր մրցակիցների հաշվեհամարին: Նա կարծում է, որ ընտրողն ինքը պետք է ներդրում կատարի իր թեկնածուի օգտին, որպեսզի հետագայում էլ նրանից պահանջի:
Լրագրողներին հետաքրքրեց, թե ընտրողն ինչո՞ւ իր քվեն պետք է տա հենց Տ. Գրիգորյանին: Նա պատասխանեց. «Մենք՝ այսինքն ես եւ իմ թիմը, ունենք մաքուր կենսագրություն եւ լավ կրթություն»: Aravot.am-ը հետաքրքրվեց՝ այդ ամենը բավարա՞ր է ՀՀ-ում ընտրություններում հաղթելու համար: Պատգամավորի թեկնածուն պատասխանեց. «Մենք եկել ենք այդ մշակույթը ձեւավորելու համար: Իրականում պետությունը կկայանա, երբ այդ չափանիշները լինեն գերակայող»:
Տ. Գրիգորյանն իր նախընտրական ծրագրով առաջարկում է վերանայել սեփականաշնորհման գործընթացը, երիտասարդական քաղաքականությունը, քանի որ այժմ՝ ըստ Տ. Գրիգորյանի, վարվում է խտրական երիտասարդական քաղաքականություն: Տ. Գրիգորյանը վստահ է, որ փոփոխությունները բերում են մարդիկ եւ առաջնորդման կարողություններով օժտված անձը կարող է անհնարը դարձնել հնարավոր:
Կարդացեք նաև
Տաթեւ ՀԱՐՈՒԹՅՈՒՆՅԱՆ
