Իսկ ՀՀԿ-ն էլ իր նախընտրական ծրագրով ցույց է տալիս, որ առաջիկա 5 տարիների համար էլ հեռահար նպատակներ ունի:
Ամեն անգամ նախընտրական շրջանում քաղաքական կուսակցություններն ամեն կերպ փորձում են ցույց տալ ու համոզել, որ հենց իրենք են այն քաղաքական ուժը, որը ժողովրդի մատից փուշ կհանի: Նրանցից ամեն մեկն իր ներկայացրած նախընտրական ծրագրում վստահեցնում է, որ հենց ինքը կարող է Հայաստանը զարգացնել ու ծաղկեցնել:
Հայաստանի հանրապետական կուսակցությունը, որպեսզի իր խոստումներում ավելի համոզիչ երեւա, ձեռքի հետ էլ նախընտրական ծրագրում ներկայացրել է այս տարիների ընթացքում կատարած աշխատանքները:
Կարդացեք նաև
ԱԺ ընտրություններից հետո ՀՀԿ-ն իշխանությունում մեծամասնություն կազմելուց հետո որոշել է առաջին հերթին մեր երկրի գյուղերը շենացնել ու դարձնել հարմարավետ. «Մենք պարտավոր ենք, բարձրացնելով գյուղատնտեսության արդյունավետությունը, գյուղում զուգահեռաբար ստեղծել կյանքի համար հարմարավետ պայմաններ: Չի կարող լինել զարգացող գյուղատնտեսություն՝ առանց հարմարավետ գյուղի»:
Իսկ Հայ ազգային կոնգրեսը այս նույն ոլորտը զարգացնելու համար առաջարկում է՝ «Հրաժարվել արտադրողներին ու մատակարարներին սուբսիդավորելու քաղաքականությունից, ինչպես ներկայումս դա արվում է սերմացուի, դիզելային վառելիքի, պարարտանյութի եւ այլնի պարագայում։ Պետությունը փողը պետք է տա գյուղացուն, նա էլ կորոշի՝ ումից ինչ գնի»։
Գյուղատնտեսության զարգացման համար ՀԱԿ-ը գտնում է նաեւ, որ պետք է քաղաքներում գյուղացիական տնտեսությունների կողմից հիմնված շուկաները վերականգնվեն ու էլի մի քանի նոր շուկաներ բացվեն. «Շաբաթ-կիրակի բոլոր քաղաքների բոլոր բակերում գյուղմթերքներ վաճառելու գյուղացիների իրավունքը պետք է պարտադիր կերպով կատարվի բոլոր քաղաքապետերի կողմից։ Որեւէ հարկ, որեւէ վճարում, տեղեկանք, կտրոն կամ ՀԴՄ գյուղացին չպետք է տա»։
Իսկ հանրապետականները գյուղմթերքների գների սեզոնային տատանումները մեղմելու համար առնվազն 3 անգամ ավելացնելու են ջերմոցային տնտեսությունների տարածքները, ինչի արդյունքում, ՀՀԿ-ն համոզված է, շուրջ 30 հազար նոր աշխատատեղ կստեղծվի:
Գյուղացու սիրտը շահելու համար ՀԱԿ-ը իշխանության գալու դեպքում որոշել է հարյուրավոր գյուղացիների վարկային տոկոսները սառեցնել. «Ներառյալ 01.04.2012 բոլոր վարկերի (74 մլրդ դրամ) տոկոսադրույքները սառեցվում են, գյուղացիները մարում են մայր գումարը առանց տոկոսի: Տոկոսադրույքների մարումը կիսով չափ իր վրա է վերցնում ՀՀ կառավարությունը, իսկ մյուս կեսը դուրս է գրվում ի հաշիվ գյուղատնտեսական վարկերի նկատմամբ կիրառվող ցածրացված տնտեսական նորմատիվների»։ ՀԱԿ-ը մեկ այլ ուշագրավ դրույթ էլ է ներկայացնում իր ծրագրում: Ըստ նրա՝ Հայաստանով մեկ պետք է բացվեն տասնյակ դպրոցներ, որտեղ գյուղացիները պետության հաշվին կստանան հիմնական գյուղատնտեսական ու տնտեսագիտական գիտելիքներ։
Ժողովրդի առողջության համար մտահոգված են թե՛ ՀԱԿ-ը, թե՛ ՀՀԿ-ն: Այս կուսակցություններն իրենց ծրագրում խոստանում են առողջացնել ազգը, կանխարգելել հիվանդությունները առողջ ապրելակերպ ներդնելու միջոցով:
ՀՀԿ-ն ամեն ինչ անելու է, որ հայ ազգը զանգվածաբար զբաղվի սպորտով: Առողջ ապրելակերպի ներդրման համար հանրապետականները մշտապես իրենց ուշադրության տակ են պահելու ծխելու դեմ պայքարի հարցերը եւ երաշխավորելու են առողջ եւ անվտանգ սնունդ:
Առողջապահության ոլորտում պարտադիր բժշկական ապահովագրության մեթոդով ՀԱԿ-ն էլ առաջարկում է՝ «Հարուստը վճարում է աղքատի, առողջը՝ հիվանդի, աշխատողը՝ գործազուրկի եւ երիտասարդը՝ տարեցի համար: Պետության կողմից ոչ թե բուժհիմնարկների, այլ քաղաքացիների ֆինանսավորում»:
Ինչ վերաբերում է բնապահպանական խնդիրների՝ կուսակցությունների նախընտրական ծրագրերի իրականացմանը, ապա ՀՀԿ-ն ընդլայնելու է բնության հատուկ պահպանվող տարածքները, ուժեղացնելու է շրջակա միջավայրի պետական վերահսկողությունը, կեղտաջրերի կենսաբանական մաքրման նոր կայաններ է ստեղծելու, հներն էլ՝ հիմնանորոգելու. «Շարունակելու ենք Սեւանա լճի էկոլոգիական հավասարակշռության վերականգնումը եւ պահպանությունը»: Իսկ ՀԱԿ-ը համոզված է, որ բնությունը կփրկվի եւ կառողջանա, իրենց իսկ ձեւակերպմամբ՝ «ներկայիս հանցավոր ռեժիմից օր առաջ ձերբազատվելով»:
ՆԵԼԼԻ ԲԱԲԱՅԱՆ
«Առավոտ» օրաթերթ
