Երբ հայտնի քաղաքական գործիչ կամ պարզապես ճանաչված մարդ է մահանում սրտի կաթվածից, միանգամից լուրեր են տարածվում, թե` «սարքած գործ է, սննդի մեջ դեղ են լցրել»: Այդպիսի դեղամիջոց իսկապես կա, որն, ըստ մասնագետների, դիահերձման արդյունքներն էլ ցույց չեն տալիս: Այսօր «Պոստ Սկրիպտում» մամուլի ակումբում Aravot.am-ը Էրեբունի բժշկական կենտրոնի սրտաբան Համլետ Հայրապետյանից հետաքրքրվեց, թե արդյոք դեղամիջոցով հնարավո՞ր է սրտի կաթված առաջացնել եւ այդքան հե՞շտ է նման դեղորայք ձեռք բերելը:
«Նման հարցերը նախ շատ կրիմինալ են եւ դժվար թե մենք պետք է պատասխանենք,իհարկե նման բան չի կարող պատահել, քանի որ նման դեղամիջոցների ձեռք բերումը շատ դժվար է»,-վստահեցրեց սրտաբանը: Նրա համոզմամբ, նման լուրեր տարածող մարդիկ «տգետ են ու սիրում են բամբասել»:
Ասուլիսին ներկա առողջապահության նախարարության հանրային առողջության բաժնի պետ Ալեքսանդր Բազարչյան էլ անդրադառնալով մեր հարցին ասաց. «Մահացող պաշտոնյաներն անգամ տեղյակ չեն լինում, որ իրենց մոտ առկա է սրտային հիվանդություն, այդ մահացությունները պարզապես դժբախտություններ են եւ ոչ ավելին, բնավ էլ հարկավոր չէ մահից հետո պատճառներ փնտրել»:
Սրտաբանի ներկայացմամբ, հատկապես գարնանը սրտային հիվանդությունները սրվում են, այդ իսկ պատճառով հարկավոր է ճիշտ կենսակերպ վարել. «Պետք է հետեւել սննդակարգին, մեր տղամարդիկ ավելի շատ ուտում են ճարպոտ ուտելիքներ, քան մի կես ժամ զբոսնում են, նաեւ ծխելն է շատ նպաստում սրտանոթային հիվանդությունների զարգացմանը»:
Կարդացեք նաև
Ըստ մասնագետների, Հայաստանում ոչ վարակային հիվանդությունների տոկոսը բավականին բարձր է, դրանց հետեւանքով մահացությունների մակարդակը կազմում է 50 %: Իսկ այն հարցին, թե ինչո՞ւ գումար չունեցող հիվանդին հրաժարվում են վիրահատել, բժիշկ Հայրապետյանն ասաց, որ ֆինանսավորման խնդիրներով պետք է պետությունը զբաղվի. «Բժիշկներին մնա բոլորին էլ անվճար կվիրահատենք: Բայց հո բոլորին չենք կարող օգնել»:
Նշենք, որ մեր երկրում սրտի վիրահատությունը 1 միլիոն դրամից մինչեւ 5-6 միլոն դրամ է:
Սրտաբանի տվյալներով, առաջիկայում, որպես կարեւոր խնդրի լուծում սրտի ստենդավորում պետք է իրականացվի ոչ միայն Երեւանում այլեւ մարզերում. ումրիում եւ Գորիսում արդեն իրականացվում են այս ծրագրի իրագործման աշխատանքները:
Սյուզաննա ԱՍԱՏՐՅԱՆ
