Երեւանյան փողոցներում երթեւեկող հասարակական տրանսպորտային միջոցների, տաքսիների եւ ավտոմեքենաների վրա ՀՀԿ զինանշանով ու կարգախոսով դրոշներ են հայտնվել։
Մինչդեռ ՀՀ ընտրական օրենսգրքի 20-րդ հոդվածի 2-րդ կետում հստակ նշված է, որ «արգելվում է քարոզչական պաստառներ փակցնելը պետական կամ տեղական ինքնակառավարման մարմինների զբաղեցրած շենքերի, հասարակական սննդի, առեւտրի օբյեկտների եւ հասարակական տրանսպորտի վրա կամ ներսում՝ անկախ սեփականության ձեւից»։
Լուսանկարը, որտեղ պարզ երեւում է, որ Երեւան-Աբովյան երթուղու ավտոբուսի վրա ՀՀԿ դրոշներ են ամրացված, արվել է երեկ՝ Երեւանի Մաշտոցի պողոտայում։
Կարդացեք նաև
Ինչո՞ւ Երեւանի քաղաքապետարանը եւ ԿԸՀ-ն չեն արձագանքում Ընտրական օրենսգրքի նման կոպիտ խախտմանը։ ԿԸՀ մամուլի քարտուղար Հերմինե Հարությունյանն ասաց, որ նշված հարցը կարող է մեկնաբանել միայն ԿԸՀ քարտուղար Արմեն Սմբատյանը, սակայն ողջ օրվա ընթացքում Սմբատյանը մեր հեռախոսազանգերին այդպես էլ չպատասխանեց։
Իսկ ահա Երեւանի քաղաքապետարանի հասարակայնության հետ կապերի եւ տեղեկատվության վարչության պետ Արթուր Գեւորգյանն ասաց, որ Երեւան– Աբովյան երթուղին մասնավոր է, միջքաղաքային է, հետեւաբար՛ այդ երթուղին Երեւանի քաղաքապետարանի ենթակայության տակ չէ: «Այսինքն, մենք որեւէ կերպ չենք կարող վերահսկել այդ ավտոբուսների աշխատանքը։ Տրանսպորտի մեծ մասը մասնավոր է։ Մերը հիմնականում ավտոբուսներ են, այսինքն՝ ավտոբուսների մեծ մասը Երեւան համայնքի սեփականությունն է, միկրոավտոբուսային երթուղիներ մենք չունենք»,- ասաց Գեւորգյանը։
Հարցին, թե Երեւանի քաղաքապետարանը հետեւում է, որ գոնե իր ենթակայության տակ գտնվող տրանսպոոտային միջոցներում Ընտրական օրենսգրքի խախտումներ չլինեն, Գետրգյանն ասաց՝ այո, միեւնույն ժամանակ պնդելով, թե չկա որեւէ օրենք, որը կարգելեր տրանսպորտի վրա քարոզչական նյութերի տեղադրմանը։ Ի պատասխան դիտարկմանը, որ այդպիսի օրենք, այնուամենայնիվ, կա, Երեւանի քաղաքապետարանի հասարակայնության հետ կապերի եւ տեղեկատվության վարչության պետն ասաց. «Դե, ես իրավաբան չեմ։ Որեւէ բան ասել չեմ կարող»։
Անի ԳԵՎՈՐԳՅԱՆ
«Հայկական ժամանակ»
