Քաղաքացիական հասարակության ֆորումի
Հայաստանի ազգային պլատֆորմի
ՀԱՅՏԱՐԱՐՈՒԹՅՈՒՆԸ
– Կարեւորելով 2012թ. ՀՀ Ազգային ժողովի ընտրությունների անցկացումը մեր երկրի առաջադիմության համար,
– ընդգծելով ընտրությունները հայ հասարակության ժողովրդավարական ձգտումներին եւ միջազգային չափորոշիչներին համապատասխան անցկացնելու անհրաժեշտությունը,
– նկատի առնելով առաջիկայում Հայաստանում կայանալիք խորհրդարանական ընտրությունների նշանակությունը Եվրամիության հետ մեր երկրի համագործակցության ամրապնդման եւ Արեւելյան գործընկերության շրջանակներում նախատեսված բարեփոխումների իրականացման գործում,
– գիտակցելով քաղաքացիական հասարակության պատասխանատվությունը ընտրություններն ազատ, արդար եւ թափանցիկ ընթացակարգերով անցկացնելուն աջակցելու գործում,
– շահագրգռված լինելով Արեւելյան գործընկերության երկրներում ժողովրդավարական ինստիտուտների զարգացման գործում ԱլԳ Քաղաքացիական հասարակության ֆորումի ջանքերի ակտիվացմամբ,
ՔՀՖ Հայաստանի ազգային պլատֆորմը ողջունում է ընտրություններում ՔՀԿ-ների՝ որպես անկախ դիտորդներ հանդես գալը, ընտրական գործընթացների տարբեր բաղադրիչների մոնիտորինգում, ՀՀ քաղաքացիներին իրենց ընտրական իրավունքներին եւ պարտականություններին ծանոթացնելու գործում ՀԱՊ անդամների եւ ընդհանուր առմամբ հասարակական կազմակերպությունների մասնակցությունը:
Մենք բնական եւ օրինաչափ ենք համարում, երբ հասարակական կազմակերպությունների առանձին ներկայացուցիչներ որոշում են մուտք գործել քաղաքական ոլորտ եւ առաջադրում են իրենց թեկնածություններն ընտրություններում:
Միաժամանակ, ՀԱՊ-ը՝
- նշում է, որ Հայաստանի հասարակական կազմակերպությունները բազմազան են եւ սկզբունքորեն չեն կարող աջակցել որեւէ կոնկրետ քաղաքական ուժի: ՀԿ-ներին անդամակցությունը չի կարող հիմնված լինել կուսակցական կողմնորոշումների վրա, եւ աջակցությանը վերաբերող հարցը չի կարող դրվել այդ կազմակերպությունների քննարկումների օրակարգում: Նշված սկզբունքները բխում են նաեւ ՀՀ օրենսդրությունից, որը հասարակական կազմակերպություններին արգելում է ուղղակիորեն ներգրավվել քաղաքական գործունեության մեջ: Հետեւաբար՝ ՀԿ-ներն իրավունք չունեն հայտարարել իրենց կողմից այս կամ այն կուսակցությանը կամ թեկնածուին աջակցության մասին,
- գտնում է, որ վերը նշվածը վերաբերում է նաեւ հայրենակցական միություններին, որոնց կողմից այս կամ այն քաղաքական ուժին աջակցելու մասին հայտարարությունները կարող են ներազգային, միջտարածաշրջանային երկպառակությունների հիմք դառնալ,
- բարեգործական հիմնադրամների օգտագործումը նախընտրական քարոզչության նպատակով՝ համարում է ոչ միայն գործող օրենսդրության կոպիտ խախտում, այլ նաեւ բարեգործության գաղափարի վարկաբեկում,
- ընդգծում է, որ հասարակական կազմակերպությունների այն ներկայացուցիչները, ովքեր թեկնածու են առաջադրվել խորհրդարանական ընտրություններում, հանդես են գալիս բացառապես անհատ անձերի կարգավիճակով, այլ ոչ թե՝ որպես իրենց կազմակերպությունների պատվիրակներ,
- պնդում է, որ իրենց թեկնածությունն առաջադրած ՀԿ-ների ներկայացուցիչները նախապես, բայց ոչ ուշ, քան նախընտրական քարոզչության ժամանակաշրջանի սկիզբը, ընդհատեն գործունեությունն իրենց կամ որեւէ այլ հասարակական կազմակերպությունում,
- անընդունելի է համարում տեղական եւ միջազգային կառույցների կողմից ՀԿ-ներին տրամադրված դրամաշնորհների օգտագործումն այս կամ այն քաղաքական ուժին, թեկնածուներին նախընտրական մրցակցությունում առավելություն տալու նպատակով:
