«Ժառանգություն» կուսակցությունը մարտի 30-ին հայտարարություն էր տարածել, որում ասված էր, թե Սյունիքի մարզում «Ժառանգության» նախընտրական շտաբի հիմնադրման համար Գորիս մեկնած ՀՀ ԱԺ պատգամավոր Զարուհի Փոստանջյանի եւ կուսակցության Գորիսի ստորաբաժանման ակտիվիստների առջեւ Սյունիքի մարզային իշխանությունները խոչընդոտներ են հարուցել: Ըստ այդմ, Գորիսում քաղաքացիները, ովքեր «Ժառանգության» շտաբի հիմնադրման համար տարածք էին տրամադրել , «ինչ-ինչ իշխանական ճնշումներից հետո խնդրել են վերադարձնել իրենց տարածքի բանալիները եւ հանել շտաբի վրա փակցված «Ժառանգության» լոգո-նշանը»:
Այսօր «Ժառանգություն» կուսակցության փոխնախագահ Ռուբեն Հակոբյանը Aravot.am-ի հետ զրույցում, անդրադառնալով Սյունիքի մարզում նախընտրական շտաբ բացելու հետ կապված խոչընդոտներին եւ դրանից հետո տեղի ունեցած զարգացումներին, ասաց, թե կուսակցությունն անուշադրության չի մատնել այդ արտառոց դեպքը, ինչի առիթով կուսակցության կողմից արված հայտարարությանը արձագանքել են նաեւ միջազգային կազմակերպությունները, եւ օրեր առաջ ինքն ու Զարուհի Փոստանջյանը եղել են Գորիսում: «Մենք գնացինք վերաբացելու մեր գրասենյակը: Պարզվեց, որ այդ ամենի նախաձեռնողը եղել էին ուժային կառույցները եւ մարզպետը այս հարցում որեւէ մասնակցություն չի ունեցել: Զարուհին արդեն համապատասխան հարցապնդում է կատարել ԱԱԾ-ին եւ ՀՀ ոստիկանապետին՝ նշելով համապատասխան փաստերը, եւ առաջիկայում, կարծում եմ, մենք կունենանք դրա պատասխանը»,- ասաց Ռուբեն Հակոբյանը: Մեր ճշտող հարցին, թե՝ «ուժային կառույցներ» արտահայտությունը ընդհանրական է, եւ արդյոք «Ժառանգությունը», գոնե, մոտավոր պատկերացում ունի՞, թե խոչընդոտների հարուցման աղբյուրը ԱԱԾ-ն, թե՞ ոստիկանությունն են եղել՝ Հակոբյանը ենթադրաբար ասաց՝ թերեւս, ԱԱԾ-ն:
Իսկ ապրիլի 6-ով թվագրված եւ ՀՀ ԱԱԾ պետ Գորիկ Հակոբյանին, ՀՀ ոստիկանապետ Վլադիմիր Գասպարյանին ու նաեւ ՀՀ ՄԻ պաշտպան Կարեն Անդրեասյանին ուղղված պատգամավորական հարցապնդման մեջ Զարուհի Փոստանջյանը մասնավորապես գրել էր. «Սույն թվականի մարտի 29-ին գտնվել եմ ՀՀ Սյունիքի մարզի Գորիս, Կապան, Մեղրի և Ագարակ քաղաքներում: Ամբողջ ուղևորության ընթացքում ինձ հետևել է «Մերսեդես» մակնիշի 27 ou 555 պետհամարանիշի ավտոմեքենայի վարորդը: Հիմք ընդունելով վերոգրյալը՝ խնդրում եմ պարզել, թե ո՞վ էր վերոնշյալ ավտոմեքենայի վարորդը եւ ինչ նպատակ էր հետապնդում՝ հետեւելով ինձ»:
Ռուբեն Հակոբյանի ասելով, ինքն ու Զարուհի Փոստանջյանը Գորիսում հանդիպել էին նաեւ մարզպետ Սուրեն Խաչատրյանին, որը հավաստիացրել էր, թե ինքն ընդհանրապես կապ չունի այդ միջադեպի հետ ու նաեւ խոստացել էր իր ուշադրության կենտրոնում պահել այս հարցի հետաքննության ընթացքը։ Ի դեպ, այն տարածքը, որտեղ «Ժառանգությունը» մտադիր էր, ու, այնուամենայնիվ բացել էր իր նախընտրական շտաբը, պատկանում է ֆիզիկական անձի: «Մենք վերաբացեցինք մեր նախընտրական շտաբը հենց նույն հասցեում, ինչը մեզ համար սկզբունքային էր: Այդ շտաբ այցելեցինք հենց մարզպետարանի ներկայացուցչի հետ, եւ շտաբը վերաբացեցինք նրա ներկայությամբ»,- պատմեց պարոն Հակոբյանը՝ ի հավելումն մեր հարցին ասելով, թե այս խնդիրն իր շարունակությունը կունենա, եւ դրա մասին ընթացքում տեղեկացվեն նաեւ լրատվամիջոցները:
Կարդացեք նաև
Aravot.am-ը ՀՀ ոստիկանությունից փորձեց ճշտել, թե արդյոք նամակը քննարկվել, ու դրան ու պատասխան տրվե՞լ է, թե՞ ոչ: ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանն ասաց, թե նամակը ստացել են, եւ դրան համապատասխան ընթացք կտրվի:
ՆԱԻՐԱ ՄԱՄԻԿՈՆՅԱՆ
Մանրամասները կարդացեք «Առավոտի» վաղվա տպագիր համարում
