ՀԱԿ-ին անընդհատ մեղադրում են, որ ԲՀԿ-ի նկատմամբ հանդուրժողական վերաբերմունք ունի: Այդ խտրական վերաբերմունքի վերջին դրսեւորումն այն էր, որ ՀՀՇ վարչության նախագահ Արամ Մանուկյանը Կոնգրեսի վերջին հանրահավաքին բեմահարթակից ցուցադրական ներկայացրեց միայն ՕԵԿ-ի ընտրակաշառքները՝ ջեմն ու օծանելիքը, իսկ ԲՀԿ-ի գարին ու սելիտրան չցուցադրվեց:
Այս առնչությամբ Aravot.am-ը ՀԱԿ համակարգող Լեւոն Զուրաբյանից հետաքրքրվեց, թե իսկապե՞ս կա հանդուրժողականություն՝ ԲՀԿ-ի նկատմամբ: Ի պատասխան Լեւոն Զուրաբյանը նշեց, որ իրենք ունեն հստակ ռազմավարություն, թե ում են դարձնում թիրախ: Այնուամենայնիվ, ըստ Լեւոն Զուրաբյանի, իրենք պատրաստ են քննարկել ցանկացած հարց, որը կբարձրացվի միասնական շտաբում: Մեր դիտարկմանը, որ ընտրակաշառք բաժանողների ցանկում ԲՀԿ-ի անունն էլ են շոշափում քաղաքական ուժերը՝ պարոն Զուրաբյանը պատասխանեց. «Դրա համար մենք ասացինք, որ բոլոր նրանք, ովքեր այդ հարցերը բարձրացնում են, բերեն միասնական շտաբ, մենք դա քննարկենք: Ավելին, ես պնդեցի, որ «Ժառանգության» առաջարկը մտցվի վերջնական փաստաթղթի մեջ, եւ դա արվեց»: Այսինքն չկա՞ հանդուրժողականություն ԲՀԿ-ի նկատմամբ՝ պարոն Զուրաբյանը վստահեցրեց, որ ոչ. «Բացարձակ, ո՞նց կարող է նման բան լինել: Ցանկացած անօրինականություն մեզ համար անընդունելի է, եւ որեւէ կապ չունի, թե ով է արել»:
Կոմունիստական կուսակցության առաջնորդ Ռուբեն Թովմասյանն իր վերջին ասուլիսում նշել էր, որ ՀԱԿ-ն է իր մրցակիցը, եւ որ 90-ականներին հենց ՀՀՇ-ն երկիրը «շողուլից գցեց»: Ի տարբերություն կոմունիստների, ՀԱԿ-ը նրանց իր մրցակիցը չի համարում: Լեւոն Զուրաբյանն այս առնչությամբ համաձայնեց կոմունիստների հետ միայն մի մասով՝ «Ես համաձայն եմ, որ իրենք մնացել են անցյալում՝ 90-ականներից այս կողմ չեն եկել եւ դեռ տանում են 90-ականների ճակատամարտը»:
Կարդացեք նաև
Հռիփսիմե ՋԵԲԵՋՅԱՆ
