«Ժողովուրդը ցույց կտա»,- Aravot.am-ի եւ «Ազատություն» ռադիոկայանի հետ զրույցում ասաց թիվ 19 ընտրատարածքում մեծամասնական ընտրակարգով պատգամավորության թեկնածու առաջադրված պաշտոնաթող գեներալ Սեյրան Սարոյանը՝ պատասխանելով հարցին՝ ինչպե՞ս է գնահատում հաղթելու իր հնարավորությունները:
Aravot. am-ը հետաքրքրվեց՝ ինչպե՞ս է Սարոյանը վերաբերվում նույն ընտրատարածքում առաջադրված պատգամավորության թեկնածու Հակոբ Հակոբյանի՝ իր դեմ սկսած դատական գործընթացին, որով փորձում է ապացուցել, թե Սարոյանը պատգամավորության 5 տարիներից 2,5-ն անցկացրել է ՌԴ-ում, իր բիզնեսները ղեկավարելով: «Կա օրենք, ժողովուրդ, պետություն: Ստուգել են, տեսել են, փաստերը կան. պարզաբանվել ա, որ դա նորից հերյուրանք ա»: Հարցին՝ ինչի՞ է ստում Հակոբյանը, Սարոյանը պատասխանեց. «Չեմ կարա ասեմ ստում ա, կարողա մարդը ինֆորմացիա ա ունեցել, ինչ պարտադիր ա ստի: Փորձեց ճշտել՝ ճշտեց»: Հետաքրքրվեցինք՝ նորմա՞լ է վերաբերվում դրան, մանավանդ, որ արդեն քանի տարի է իրար հետ մրցակցության մեջ են: Պատասխանը եղավ. «Նորմալ, ինչ ա եղել, մեկի հետ պտի՞ մրցենք»:
Հետաքրքրվեցինք նաեւ, թե ինչպե՞ս է, որ ՀՀԿ-ն այդ ընտրատարածքում արդեն երկրորդ անգամ սատարում է իրեն, այն պարագայում, երբ Հակոբ Հակոբյանը ՀՀԿ անդամ է: «Որովհետեւ ես այդ կուսակցությանն ավելի սրտամոտ եմ»,- ասաց Սարոյանը: ՀՀԿ-ին սրտամոտությունն արտահայտվում է՝ «Իմ ապրած կյանքով, իմ անցած ուղիով: Խի դուք չգիտե՞ք ես ինչ ուղի եմ անցել՝ եւ ղարաբաղյան պատերազմ, եւ բանակաշինություն, էդ ամբողջ Հանրապետական կուսակցության ղեկավարները որ եղել են, նրանք մեզի միշտ սրտամոտ մարդիկ են եղել»:
«Ազատություն» ռադիոկայանի հարցին՝ ինչպե՞ս է վերաբերվում այն քննադատություններին, որ այս ԱԺ-ում այդպես էլ որեւէ օրենսդրական նախաձեռնությամբ հանդես չեկավ, բայց նորից է ցանկանում պատգամավոր դառնալ՝ Սարոյանն ասաց. «Ամեն ինչ հեռուստացույցով խոսալով չի, գործով ա: Մենք գործ ենք արել, էլի նորմալ անելու ենք: Խոսացողները խոսում են, աշխատողները՝ աշխատում»: Սարոյանն ասաց, որ ինքը օրենսդրական նախաձեռնություններով հանդես է եկել, այն էլ մի քանի: Դժվարացավ մտաբերել հատկապես ի՞նչ օրենսդրական նախաձեռնություններ է ունեցել, ասաց. «Որը մեր ժողովրդին նորմալ ա, որը մեր ժողովրդին տալու ա նորմալ կյանք, աշխատանք, ապագա»: Սարոյանը ցանկանում է նորից պատգամավոր դառնալ, որովհետեւ՝ «Ես իմ ժողովրդին պետք եմ»:
Կարդացեք նաև
Հարցին՝ ինչի՞ չի ցանկանում վերադառնալ բանակ, Սարոյանը պատասխանեց. «Ես իմ գործը բանակում արել եմ: Աստված չանի, եթե պատերազմ սկսվի, առաջին գիծ մենք ենք լինելու»:
ՀՀԿ-ի հաղթանակի շանսերը Սարոյանը գնահատում է «շատ ուժեղ եւ հզոր», գտնում է, որ չնայած առկա խնդիրներին «ժողովուրդը վստահում ա ՀՀԿ-ին, գիտի ղեկը ում ձեռքին ա»:
Հայ ժողովրդի վատ ապրելն էլ կապում է համաշխարհային ֆինանսատնտեսական ճգնաժամի հետ ու զարմանում, թե ի՞նչ մեղք ունի այստեղ ՀՀԿ-ն:
Նելլի ԳՐԻԳՈՐՅԱՆ
