Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանի նախագահությամբ շարունակվեց Գագիկ Սաֆարյանի դեմ հարուցված քրեական գործով դատական վիճաբանությունների փուլը:
Գագիկ Սաֆարյանը մեղադրվում էր խարդախության համար. 21 000 դոլար վերցնելու եւ դրա միջոցով Սամվել Կոստանյանի որդուն բարձրագույն ուսումնական հաստատություն ընդունելու համար:
Սամվելի որդին բուհ ընդունվել է, բայց ոչ այն բուհը, որի համար նրա ընկերոջ միջոցով գումար էր տրվել Գագիկ Սաֆարյանին:
Մեղադրող Արմեն Բոշնաղյանը պահանջել է 6 տարվա ազատազրկում:
Կարդացեք նաև
Գագիկ Սաֆարյանը հանդես կավ պաշտպանական ճառով:
Նա ասաց, որ չի ընդունում մեղադրանքը, քանի որ ինքը պարտքուպահանջ չունի: Ավելին, կրկնակի անգամ վճարել է տուժողին, բայց ոչ թե՝ որ պարտք է նրան, այլ՝ որ տվել է իր ընկերոջ պարտքի գումարը:
«Սխալս այն էր, որ ստացական կամ գիր չեմ պահանջել նրանից»,- ասաց նա:
«Չգիտեմ՝ ինչ վճիռ է ինձ սպասվում, բայց կարող եմ ասել, որ հայտնվել եմ գերու կամ պատանդի վիճակում: Իմ անմեղությունը պիտի ապացուցեմ մինչեւ վերջ: Ինչ եմ կորցնում անցյալ տարվանից «Նուբարաշեն» քրեակատարողական հիմնարկում գտնվելով. 40 կգ անձնական քաշս, 2 անչափահաս երեխա եւ խնամքիս տակ գտնվող ընտանիքիս, 30 հազար դոլար գումարս: Ես չեմ կատարել այն արարքը»,- ասաց Գ. Սաֆարյանը:
Նա ներկայացրեց իրեն, որ «Ղարաբաղ» կոմիտեի հիմնադիր անդամ է եղել, 1990-91թթ. կառավարության օպերատիվ շտաբի ներկայացուցիչ, Արցախի ազգային խորհրդի անդամ, «Փյունիկ» ֆուտբոլային թիմի նախկին տնօրեն:
Նկարագրեց, թե ինչպես է իրեն 2009թ. օգոստոսի 24-ին ազգային անվտանգության ծառայությունը ձերբակալել խարդախության համար:
2010թ. մայիսի 13-ին Երեւանի Ավան եւ Նոր Նորք վարչական շրջանների ընդհանուր իրավասության դատարանը նրան դատապարտել է 2 տարվա պայմանական ազատազրկման:
Ըստ Գ. Սաֆարյանի, իրեն ազգային անվտանգության ծառայությունը ձերբակալել է առանց հիմնավոր մեղադրանքի: Եվ որ իր գործով քննիչ, ԱԱԾ փոխգնդապետ, վարչության պետի տեղակալ Արմեն Տեր-Մինասյանը կաշառք վերցնելու համար ($7000, Ուջան գյուղի բնակիչ Տիգրան Պետրոսյանից) արդեն դատապարտվել է եւ գտնվում է «Վարդաշեն» ՔԿՀ-ում:
Նա հայտարարեց, որ ինքը անձնական վրեժխնդրության զոհ է, որ իր նկատմամբ վրեժ է լուծել ԱԱԾ գեներալ Զավեն Նանյանը, որն, ի դեպ, 2010թ. հունվարին հեռացվել է ԱԱԾ համակարգից՝ պետական միջոցները վատնելու մեղադրանքով:
Գ. Սաֆարյանն ասաց, որ կյանքի գնով պատրաստ է ապացուցելու, որ ինքն արդար է, եթե անգամ իր նկատմամբ ազատազրկման դատավճիռ կայացվի:
Դատարանն անցավ խորհրդակցական սենյակ՝ վճիռ կայացնելու:
Գագիկ Սաֆարյանին դատարանը դատապարտեց 5 տարվա ազատազրկման:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
