Երեկ Հայաստանի հանրապետական կուսակցությունը Երեւանի Էրեբունի վարչական շրջանում նախընտրական բազմամարդ հանրահավաք ապահովելու համար այդ շրջանի բոլոր պետական կառույցների աշխատակիցներին ներքին կարգով հրահանգել էր անպայման ներկա լինել հավաքին: Համենայնդեպս, այսպես էին վստահեցնում «Առավոտի» խմբագրություն ահազանգած մի շարք քաղաքացիներ: Ընդ որում, ըստ բնակիչների՝ պետական աշխատողներն էլ իրենց ծանոթ-բարեկամներին, ենթականերին էին հորդորել մասնակցել ՀՀԿ-ի հանրահավաքին: Մեզ զանգահարած քաղաքացիները հավաստիացրին, որ նրանց սպառնում են՝ ՀՀԿ հանրահավաքին ներկա չլինելու դեպքում լուրջ խնդիրներ կունենան: Օրինակ՝ զանգահարողներից մեկը պատմեց, որ իր երեխաներից մեկի մանկապարտեզի դաստիարակը ծնողներին հորդորել է ներկա լինել ժամը 18.00-ին կայանալիք հանրահավաքին. «Մենք, անկեղծ ասած, մի քիչ զարմացանք ու հրաժարվեցինք, սակայն դաստիարակն այնպիսի տոնով խոսեց մեզ հետ, վախեցանք, որ մեր չգնալու համար երեխաները կտուժեն: Մանկապարտեզի դաստիարակը նույնիսկ փորձեց արդարանալ, որ ինքը ոչ մի կապ չունի ՀՀԿ-ի հետ, բայց թաղապետարանից են նրան հրահանգել: Ասաց՝ բա մեր ջանը քա՞ր ա, որ մենք էլ ուզած-չուզած՝ գնալու ենք»:
Բնակիչներից մեկի պատմելով էլ՝ Էրեբունի վարչական շրջանի մի քանի դպրոցների աշխատակիցներին նույնպես հորդորել են թե՛ իրենք, թե՛ բարձր դասարանի աշակերտները եւս՝ եթե կարող են ծնողներին ու իրենց հարեւան-բարեկամներին հավաքել ու մասնակցել հանրահավաքին:
«Առավոտ» օրաթերթ
