Երեկ «Առավոտի» հետ զրույցում մեկնաբանելով ՀՀ ԿԳ նախարար Արմեն Աշոտյանի հրամանով իր հանդեպ կիրառված կարգապահական տույժը՝ Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանը հայտնել էր, որ ոչ միայն դատարան է դիմելու, այլեւ վարչապետին, որպեսզի նա որոշի ԿԳ նախարարի հետագա պաշտոնավարման նպատակահարմարությունը: Ի պատասխան՝ իր Facebook-յան էջում Արմեն Աշոտյանը ռեկտորի պահվածքը որակել է տարօրինակ, իսկ անհամաձայնությունը հայտնելու արտահայտչամիջոցները՝ բարեկրթության բոլոր սահմաններն անցնող: ԿԳ նախարարությունը նաեւ «Առավոտին» է տրամադրել որոշ փաստաթղթեր, ինչպես նաեւ Զոլյան-Աշոտյան նամակագրական ողջ «երկխոսությունը» «թեժ» թեմայի մասին:
«Առավոտ» օրաթերթ
