Երեկ Ազատության հրապարակում կայացավ ՀՅԴ-ի քարոզարշավային առաջին հանրահավաքը, որը բավական հետաքրքիր էր կազմակերպած։ Հրապարակում բեմ էր տեղադրված, որի վրա, բացի լուսաձայնային տեխնիկայից եւ մեծ էկրանից, նաեւ Երվանդ Երզնկյանի ղեկավարած Հանրային հեռուստառադիոընկերության էստրադային-սիմֆոնիկ նվագախումբն էր, որը ողջ հանրահավաքի ընթացքին ներկա էր։ Դաշնակցական բանախոսներից յուրաքանչյուրը բարձրախոսին մոտենում էր սիմֆոնիկի կողմից կատարվող որեւէ երաժշտության ներքո։ Իսկ ելույթների ժամանակ Երզնկյանը նստում էր բեմի վրա գտնվող աթոռին, բջջային հեռախոսի վրա ինչ-որ բան էր նայում, ելույթների ավարտին էլ նորից մոտենում էր նվագախմբին ու նորից երաժշտություն հնչեցնում։ Հանրահավաքի ավարտից հետո էլ տեղի ունեցավ համերգ, որտեղ նվագախումբը նվագակցեց դաշնակցական երգեր կատարող երգիչներին։
Թե ինչ քաղաքական արդյունքներ կտա այս նվագախմբային նորամուծությունը, դժվար է ասել։ Բայց որ համերգների խիտ գրաֆիկ չունեցող նվագախմբերն ու երգիչներն աշխատանքի նոր ֆրոնտ են ստանում, ակնհայտ է։ Հույս ունենք, սակայն, որ ընդդիմադիր Դաշնակցության հանրահավաքին ժիվոյ մուզիկա ապահովելու համար Երզնկյանը եւ նրա ղեկավարած՝ փաստացի պետական նվագախմբի անդամները զանգվածաբար չեն ազատվի աշխատանքից, եւ դա վկայությունը կդառնա այն բանի, որ Հայաստանն այլեւս ժողովրդավարական եւ ազատ մրցակցային երկիր է: Այնպես որ՝ նախազահ, մի՛ հանիր այս մարդկանց աշխատանքից։
«Հայկական ժամանակ»
