Այս օրերին քաղաքի առանձին հատվածներում կարելի է տեսնել «ԱԺ ընտրություններ-2012» մակագրությամբ սպիտակ ցուցատախտակներ, որոնց վրա քաղաքական տարբեր ուժեր իրենց նախընտրական պաստառներն են փակցնում։ Դա ավելի շատ արված է այդ պաստառները պատերին չփակցնելու համար, եւ որպեսզի բոլոր թեկնածուները հնարավորություն ունենան իրենց պաստառները փակցնել նույն վայրերում, սակայն դա էլ չի օգնում խուսափել պատերն աղտոտելուց։
Վերը նշված սպիտակ ցուցատախտակներին եւս երեւում է քաղաքական ուժերի անհամաձայնությունը։ Ճիշտ է, շատ տեղերում ցուցատախտակին տարբեր ուժերի պաստառները փակցվւսծ են կողք կողքի, սակայն որոշ տեղերում էլ՝ մեկը մյուսի վրա, կամ մի ցուցատախտակին մի կուսակցություն այնքան շատ պաստառներ է փակցրել, որ մյուսնեոի համար շատ քիչ տեղ է մնացել։
Երեկ Կենտրոնական ընտրական հանձնաժողովից փորձեցինք պարզել, թե ինչպես է կանոնակարգվում նախընտրական պաստառները փակցնելու գործընթացը, ինչ սկզբունքով է բաշխվում, որ քաղաքական ուժին ինչքան հատված է նախատեսվում։ ԿԸՀ մամուլի խոսնակի փոխանցմամբ՝ Կենտրոնական ընտրական հանձնաժողովը բաշխել է միայն արտաքին գովազդի համար նախատեսված տեղերը, եւ խոսքը վերաբերում է հիմնականում քաղաքում, ճամփեզրին տեղադրված մեծ գովազդային վահանակներին։ Իսկ ինչ վերաբերում է գովազդի համար նախատեսված մնացած տարածքներին եւ վահանակներին, ապա դրանց տեղերի հատկացմամբ զբաղվում են համայնքները եւ քաղաքապետարանը։
Կարդացեք նաև
Քաղաքապետարանի լրատվության եւ հասարակայնության հետ կապերի վարչության պետ Արթուր Գեւորգյանը մեզ հետ զրույցում ասաց, որ իրենք ուսումնասիրում են պաստառներ փակցնելու գործընթացը եւ այսօր հավանաբար հանդես կգան հայտարարությամբ։ Սակայն պաստառները մեկը մյուսի վրա փակցնել չի կարելի, առավել եւս արգելվում է դրանք փակցնել պատերին։ «Առանձնացված հատվածներում մեկը մյուսի վրա փակցնողը կենթարկվի պատասխանատվության, քանի որ արդեն իսկ որեւէ բարեխիղճ գովազդատու փակցրել է իր գովազդը»,- ասաց Արթուր Գեւորգյանը եւ հավելեց. «Պատերին պաստառներ կպցնելու իրավունք առավել եւս ոչ ոք չունի։ Շենքերը բաժնային սեփականություն են, եւ այդ բաժնային սեփականատերերից յուրաքանչյուրի համաձայնությունը պետք է ունենան՝ շենքի պատին ինչ-որ բան փակցնելու համար՝ լինի դա քաղաքական, թե այլ կարգի գովազդ»։
Սոնա ՀԱՐՈՒԹՅՈՒՆՅԱՆ
«Հրապարակ»
